न्यूनतम रोज लागु गरेर सबै सहुलियत प्रदान गरिएको खण्डमा चिया बगान श्रमिकहरूको हाजिरा 8 सय भन्दा माथि हुनेछः आरबी लामा

खरसाङ, (मोहन प्रसाद): भारतीय जनता पार्टीका खरसाङबाट दार्जीलिङ जिल्ला (पहाड़) का उपाध्यक्ष आरबी लामाले स्थानीय जीटीए प्रशासन अनि राज्य सरकारको कड़ा आलोचना गर्दै वर्तमानमा यिनीहरूको नीतिको कारण नै चिया श्रमिकहरू यस्तो दयनीय अवस्था पुगेको आरोप लगाएका छन्‌‍। तिनले राज्य सरकार अनि स्थानीय जीटीए प्रशासनले प्रधानमन्त्री नरेन्द्र मोदीको नेतृत्वमा रहेको केन्द्र सरकारद्वारा अगावै पारित गरिएको न्यूनतम रोजको अधिनियम पश्चिम बंगालको चिया बगानहरूमा लागू गरिएको भए साथै श्रमिकहरूले पाउनु पर्ने सबै सुविधा अनि अधिकारहरू श्रमिकहरूलाई इमान्दारी पूर्वक दिइएको भए सबै मिलाएर चिया श्रमिकको रोज 8 सय रुपियाँ भन्दा पनि धेर हुने थियो भनी बताएका छन्‌‍। तिनले राज्य सरकारले अनि स्थानीय प्रशासनले केन्द्र सरकारद्वारा जारी गरेको न्युनतम रोज ऐन जीटीए क्षेत्र सहित पश्चिम बंगालको अन्य चिया बगानहरूमा झट्टै लागुगरियोस्‌‍ भनी माग गरे। तिनले यो पनि बताए कि तिनको पत्नी एकजना चिया श्रमिक हुन्‌‍। तिनको पत्नीले चिया बगानमा दुःख गरेको तिनले देखेका छन्‌‍। चिया बगानका अन्य दिदी-बहिनीहरूले पनि वर्ष भर बगानमा दुःख गरेका देखेका छन्‌‍। चिया बगानका श्रमिकहरूको दुःख देखेर तिनले हालैमा कतिपय श्रमिकहरूलाई आफ्नो मन्तव्य राखेका थिए। यदि केन्द्र सरकारद्वारा जारी गरिएको न्यूनतम रोज पहाड़मा लागू भएको खण्डमा साथै श्रमिकहरूले पाउनु पर्ने सबै सुविधा, सहुलियत अनि अधिकार पाए भने श्रमिकहरूको रोज 8 सय रुपियाँ भन्दा पनि धेर हुनेछ । लामाले जीटीएका सत्तारुढ़ दलका नेतृत्वहरूले भाजपालाई भाटा लगाउनु पर्छ भनी भनिरहेका छन्‌‍ तर जनमानसले बुझ्नु पर्छ कि कसलाई भाटा लगाउनु पर्ने हो। केन्द्रमा रहेको भाजपा सरकारले जनहितमा, श्रमिक हितमा, बाटो, पानी, स्वास्थ्य, रोजगार आदि सबै विषयहरूमा करोडौं रुपियाँ यहाँ पठाउने गर्छ तर ती राशिहरूको यहाँ धाँधली अनि दुरूपयोग हुन्छ । विकास मूलक कार्यहरूमा यहाँ परसेन्टेज कुरो हुन्छ । जसमा नेतादेखि लिएर विभिन्न वर्गका विभागीय अधिकारीहरू पनि लिप्त रहेका देखिएको छ। चिया श्रमिकको रोजको मुद्दा सहित सबै विषय वस्तुहरूमा यिनीहरुको कारण साधारण मानिसहरूले दुःख भोग्नु परिरहेको छ भनी आरोप लगाउदै भाजपाको पक्षबाट न्यूनतम रोज ऐन लागु गरेर चिया श्रमिकहरूले पाउने विभिन्न सुविधा अनि हक अधिकार श्रमिकहरूले पाएको हुनुपर्ने बताए। लामाले भने, पहाड़का कतिपय नेतृत्वहरूले भाजपा होसियार भन्छन्‌‍, ती नेताहरूले बुझ्नु पर्छ कि भाजपा होसियार नै छ। आज नरेन्द्र मोदी जस्ता भाजपाका नेतृत्वहरूको कारण अनि होसियारीले नै विश्वमा भारत देश अघि बढ़िरहेको छ। त्यति मात्र होइन, देशको विभिन्न प्रान्तमा भाजपाको जनमत बढ़िरहेको छ। हामी आश्वस्त छौँ कि आउँदो 2026 को विधानसभा चुनावमा भाजपा पश्चिम बंगालमा आउने छ, त्यसपछि सबैलाई भाजपाले पहाड़को हितमा के गर्नेछन्‌‍ भन्ने देखाइने छ।