खरसाङ, (मोहन प्रसाद): खरसाङ नगरपालिकाको देख-रेखमा पश्चिम बंगाल सरकारको मां योजना अन्तर्गत खरसाङ महकुमा अस्पताल प्राङ्गणमा एउटा मां क्यान्टिन आरम्भ भएको छ। बुधवार खरसाङ महकुमा अधिकारी, प्रिया यादव, खरसाङ नगरपालिका अध्यक्ष ब्रिगेन गुरुङ, उपाध्यक्ष सुवास प्रधान, खरसाङ नगरपालिका अभियन्ताहरू, कर्मचारीहरू साथै खरसाङ अस्पतालका प्रतिनिधिहरू, डाक्टर, नर्सहरूको उपस्थितिमा मां क्यान्टिनको विधिवत् उद्घाटन गरियो। कार्यक्रमलाई सम्बोधन गर्दै खरसाङ नगरपालिका बोर्ड अफ एडमिनिस्ट्रेशनका अध्यक्ष ब्रिगेन गुरुङले भने अनुसार, राज्यकी मुख्यमन्त्री ममता ब्यानर्जीले राज्यका आर्थिक रुपले कमजोर रहेका एवम् अन्य सबै वर्गका मानिसहरूले कम शुल्कमा भर पेट खाना खान सकोस् भनी केवल 5 रुपियाँमा खानाको प्रबन्ध गराएकी हुन्। तिनले यो पनि जनाए कि गत केहि वर्ष अघि उक्त मां क्यान्टिन खरसाङ नगरपालिका कार्यालयमा पनि चलिरहेको छ भने प्रति दिन लगभग दुई सय जना मानिसहरू केवल 5 रुपियाँमा दाल, भात, अण्डा संगै भर पेट खानाको लाभ उठाइरहेका छन्। खरसाङ महकुमा अस्पताल प्राङ्गणमा बुधवारदेखि खोलिएको क्यान्टिन अहिलेलाई अस्थायी रूपमा आरम्भ गरिएको हो। पछि अस्पताल परिसरमा पक्का भवन निर्माण गरेर क्यान्टिन सञ्चालन गरिनेछ। अर्कोतर्फ पत्रकारहरूसित बोल्दै खरसाङ नगरपालिका प्रशासनिक बोर्डका उपाध्यक्ष सुवास प्रधानले बताए अनुसार, अस्पतालमा आउने बिरामीहरू साथै बिमारीका परिवारका सदस्यहरूलाई कम शुल्कमा केवल 5 रुपियाँ भुक्तान गरेर भर पेट खानाको प्रबन्धको राज्य सरकारले गरेको छ। उक्त क्यान्टिनमा वर्तमानमा 2 सय जना मानिसहरूलाई केन्द्र गरेर खानाको व्यावस्था गरिएको छ भने दिउँसो 12 बजेदेखि बेलुका 3-4 बजेसम्म खानाको व्यावस्था रहनेछ। त्यति मात्र होईन, राज्य सरकारको अन्य एउटा योजना अन्तर्गत तयार गरिएको साथै खरसाङ नगरपालिका कार्यालय नजिक रहेको भवनमा आवश्यकमा रहेका व्यक्तिहरूलाई अथवा बिरामीहरूलाई हेर्न आएको सदस्यहरूलाई राति बस्ने व्यवस्था पनि नगरपालिकाले राज्य सरकारको योजना अन्तर्गत गरेको छ। तिनले वर्तमान राज्य सरकारको सहयोगमा खरसाङ नगरपालिकाले जनहितमा विभिन्न पक्षमा कार्य गरिरहेको छ भनी बताए।
