पश्चिम बंगाल विधानसभा निर्वाचन नजिकिँदै जाँदा भारतीय निर्वाचन आयोगले मतदाता सचेतना अभियानलाई अझ प्रभावकारी बनाउन माल्दामा नयाँ स्थानीय मस्कट सार्वजनिक गरेको छ। ‘फजली बाबु’ नाम दिइएको यो मस्कट माल्दाको प्रसिद्ध फजली आमबाट प्रेरित भएर तयार गरिएको हो।निर्वाचन आयोगले सामाजिक सञ्जालमार्फत सार्वजनिक गरेको चित्रमा ‘फजली बाबु’ लाई मतदाता परिचयपत्र समातेको र चुनाव चिह्नतर्फ औँल्याउँदै देखाइएको छ। यसको मुख्य उद्देश्य स्थानीय स्तरका मतदातासँग सहज रूपमा जोडिनु र उनीहरूलाई लोकतान्त्रिक प्रक्रियामा सहभागी हुन प्रेरित गर्नु हो। मस्कटसँगै बंगाली भाषामा दिइएको सन्देशमार्फत आगामी अप्रिल २३ मा हुने मतदानमा सहभागी हुन सबैलाई आग्रह गरिएको छ। यो सन्देश माल्दा जिल्ला निर्वाचन कार्यालयले जारी गरेको हो।
फजली आम माल्दाको पहिचानसँग गहिरो रूपमा जोडिएको हुनाले मतदाता सचेतना अभियानलाई स्थानीय संस्कृतिसँग जोड्ने प्रयास गरिएको बताइएको छ।निर्वाचन आयोगका अनुसार यस्ता सरल दृश्यात्मक सन्देश र स्थानीय प्रतीक प्रयोग गरेर मतदातालाई सजिलै बुझ्ने र आकर्षक ढङ्गले जानकारी दिन सकिन्छ। यस अभियानको मुख्य लक्ष्य योग्य मतदातालाई मतदानमा सहभागी गराउनु र मतदानको अधिकार प्रयोग गर्न प्रेरित गर्नु हो।
उल्लेखनीय छ कि पश्चिम बंगाल विधानसभा निर्वाचन सन् २०२६ को अप्रिल २३ र अप्रिल २९ मा दुई चरणमा हुने घोषणा भइसकेको छ। पहिलो चरणमा १५२ वटा र दोस्रो चरणमा १४२ वटा विधानसभा क्षेत्रमा मतदान हुनेछ। सबै २९४ सिटका लागि मतदान सम्पन्न भएपछि मतगणना मे ४ मा गरिने र निर्वाचन प्रक्रिया मे ६ सम्म पूरा हुने अपेक्षा गरिएको छ।
