गोर्खा राष्ट्रिय नारी संगठन (गोरानासं) सदर–२ का सदस्यहरूले वार्ड नं. ३० क्षेत्रमा व्यापक घरदैलो कार्यक्रम सञ्चालन गर्दै हालै सम्पन्न विधान सभा निर्वाचनमा प्राप्त ऐतिहासिक विजयका लागि स्थानीय जनसमुदायप्रति हार्दिक आभार व्यक्त गरेका छन्।उक्त कार्यक्रममा गोरानासं केन्द्रीय समिति अध्यक्ष मनिकला तामाङ को विशेष उपस्थिति रहेको थियो। घरदैलो अभियानका क्रममा संगठनका प्रतिनिधिहरूले स्थानीय बासिन्दाहरूसँग आत्मीय भेटघाट तथा विचार आदानप्रदान गर्दै जनअपेक्षा, विकासका आवश्यकता र समुदायको समग्र उन्नतिबारे छलफल गरेका थिए।
कार्यक्रमलाई सम्बोधन गर्दै नेतृवर्गले निर्वाचनमा जनताले देखाएको विश्वास र समर्थनप्रति कृतज्ञता व्यक्त गर्दै प्राप्त विजय जनताको विजय भएको बताएका थिए। साथै, जनताको भरोसालाई सम्मान गर्दै आगामी दिनहरूमा पनि सामाजिक उत्थान र जनहितका कार्यलाई प्राथमिकताका साथ अघि बढाइने प्रतिबद्धता व्यक्त गरिएको थियो।
यसै क्रममा गोरानासंकी सम्माननीय संस्थापक सदस्य गुनकासरी प्रधान सँग उहाँकै निवासमा विशेष भेटघाट गरिएको थियो। भेटका अवसरमा उहाँले संगठनको वर्तमान गतिविधिप्रति शुभकामना व्यक्त गर्दै समाजसेवा र महिला सशक्तीकरणका क्षेत्रमा अझ प्रभावकारी ढंगले कार्य गर्न सुझाव तथा आशीर्वाद प्रदान गर्नुभयो।
