इबोलाको कारण अमेरिकाले कङ्गोमा हुने नागरिकलाई स्वदेश फर्किन नदिने

इबोला संक्रमणका कारण अमेरिकाको नयाँ निर्णय : कङ्गोमा रहेका आफ्ना नागरिकलाई तत्काल स्वदेश फर्किन नदिने । प्रजातान्त्रिक गणतन्त्र कङ्गो (डीआरसी) मा इबोला भाइरसको संक्रमण तीव्र रूपमा फैलिन थालेपछि अमेरिकाले त्यहाँ रहेका आफ्ना नागरिकमाथि अस्थायी यात्रा प्रतिबन्ध लगाएको छ। नयाँ व्यवस्थाअनुसार कङ्गोमा रहेका वा हालै त्यहाँबाट बाहिरिएका अमेरिकी नागरिकले अब कम्तीमा २१ दिन तेस्रो मुलुकमा बसेपछि मात्र व्यावसायिक उडानमार्फत अमेरिका फर्किन पाउनेछन्। अमेरिकी स्वास्थ्य तथा मानव सेवा मन्त्रालयका अनुसार यो निर्णय इबोला संक्रमण अमेरिकाभित्र फैलिन नदिन अपनाइएको सावधानीका उपायअन्तर्गत गरिएको हो। सम्बन्धित अमेरिकी नागरिकको नाम अस्थायी रूपमा ‘डु–नट–बोर्ड (Do Not Board)’ सूचीमा राखिनेछ, जसका कारण उनीहरूले प्रत्यक्ष रूपमा अमेरिका जाने व्यावसायिक विमानमा यात्रा गर्न पाउने छैनन्। अमेरिकी रोग नियन्त्रण तथा रोकथाम केन्द्र (CDC) का अनुसार कङ्गोमा फैलिएको इबोला प्रकोपमा हालसम्म १,९२६ पुष्टि भएका संक्रमित भेटिएका छन् भने ७०२ जनाको मृत्यु भइसकेको छ। संक्रमण राजधानी किन्शासानजिकका क्षेत्रसम्म फैलिन थालेपछि अन्तर्राष्ट्रिय समुदायको चिन्ता बढेको छ। यसअघि एक अमेरिकी मानवीय सहायता संस्थामा कार्यरत कर्मचारी इबोलाबाट संक्रमित भएको पुष्टि भएको थियो। अर्का अमेरिकी चिकित्सकलाई उपचारका लागि जर्मनी लगिएको छ। यी घटनापछि अमेरिकी प्रशासनले आफ्ना नागरिकको आवागमनमा थप कडाइ गरेको हो। अमेरिकी विदेश मन्त्रालयले भने कङ्गोमा रहेका आफ्ना नागरिकलाई आवश्यक कूटनीतिक तथा दूतावासीय सहयोग उपलब्ध गराइने जनाएको छ। साथै, अत्यावश्यक कामबाहेक कङ्गो यात्रा नगर्न पनि नागरिकलाई आग्रह गरिएको छ।इबोला संक्रमित व्यक्तिको रगत वा अन्य शारीरिक तरल पदार्थसँग प्रत्यक्ष सम्पर्कमा आउँदा सर्ने अत्यन्त घातक भाइरल रोग हो। स्वास्थ्य अधिकारीहरूले संक्रमण नियन्त्रणका लागि निगरानी, परीक्षण, सम्पर्कमा आएका व्यक्तिको पहिचान तथा यात्रा व्यवस्थापनलाई थप कडा बनाइएको बताएका छन्।