सिक्किमका तातोपानी कुण्डहरूले पर्यटनलाई बढोत्तरी दिंदै

सिक्किम राज्य प्राकृतिक सौन्दर्य धार्मिक आस्था र औषधीय महत्वले भरिपूर्ण स्थलहरूको धनी मानिन्छ। यसै सन्दर्भमा लेगशिपस्थित जोरथाङ सडकमार्गमा पर्ने तातोपानी स्वास्थ्य, प्रकृति र आध्यात्मिकताको अनुपम संगम बनेको छ भने राभाङ्ला नजिकको रालोङ तातोपानी पर्यटकहरूका लागि विशेष आकर्षणको केन्द्र बनेको छ।
लेगशिपको सल्फरयुक्त तातोपानी आफ्नो औषधीय गुणका कारण अत्यन्त प्रसिद्ध मानिन्छ। यस तातोपानी कुण्डबाट शान्त रङ्गित नदीको मनोरम दृश्य अवलोकन गर्न सकिन्छ, जसले मन शरीर र आत्मालाई पुन: ऊर्जावान बनाउने अनुभूति दिलाउँछ। बर्खायामको समय सकिने बित्तिकै नोभेम्बरदेखि मार्च महिनासम्म यात्रीहरु तातोपानी नुहाउने वा पानीमा डुबुल्की मार्न गर्छन् जस्ले पानीमा बस्दा पुरानो बिमारहरु निको पार्न सकिन्छ, अनि घाउ खटिराबाट बाँच्न सकिन्छ भने बिश्वासका साथ मानिसहरु आउने गर्छन्। जसमा नेपाल, भुटान र अन्य छिमेकी राज्यबाट पनि तातोपानी बस्न आउने मानिसहरुको भिड लाग्ने गर्छ।
यहाँको तातोपानी प्राकृतिक रूपमा स साना ढुंगाहरूको बनोटले थुप्रिएको छ, जसले आफै एक जैविक पोखरीको रूप लिएको छ। यस तातोपानी कुण्डको महत्त्व अझ बढाउने कुरा भनेको यसको नजिकै रहेका पवित्र गुफाहरू, छोतेन र गुम्बा छन्। धार्मिक विश्वासअनुसार यहाँ आमुद्र मन्थनको कथासंग जोडिएको छ भने त्यस ताकमा राक्षसहरुले पुल बनाएको किम्बदन्ती छ। बौद्धिक मान्यता अनुसार सातौं शताब्दीमा महान् बौद्ध गुरु पद्मसम्भवले यही गुफामा ध्यान साधना गर्नुभएको इतिहास छ। अर्कोतिर
राभाङ्लाको रालोङ तातोपानीले स्थानीय भाषामा ‘रालाङ चा–चु’, पनि उत्तिकै लोकप्रिय छ। प्राकृतिक रूपमा बाफ निस्कने यी सल्फरयुक्त पोखरीहरू छाला सम्बन्धी रोगहरू निको पार्न सहयोगी मानिन्छन्। रमणीय प्राकृतिक दृश्यले सजिएको यो स्थान एक प्रकारको प्राकृतिक स्टीम साउना जस्तै अनुभूति दिन्छ। रालोङ तातोपानी कुण्ड धार्मिक दृष्टिले पनि महत्वपूर्ण छ, किनकि यो सिक्किमका पवित्र गुफामध्ये एकको नजिक अवस्थित छ। साथै, यो स्थान ट्रेकिङ्ग प्रेमीहरूका लागि स्वर्ग समान मानिन्छ। वरिपरि फैलिएका हरिया पहाड, रोमाञ्चक पदमार्गहरू र सुन्दर दृश्यले यात्रालाई अविस्मरणीय बनाउँछन्। यहाँ ट्रेकरहरूका लागि अस्थायी बसोबासका झुपडीहरू पनि उपलब्ध छन्। चराचुरुङ्गी अवलोकन तथा रंगीचंगी पुतलीहरू हेर्न चाहने पर्यटकहरूका लागि पनि यो स्थान उपयुक्त छ। रालोङ र बोरोङ तातोपानी एक–अर्काोबाट करिब ७ किलोमिटरको दूरीमा रहेकाले दुबै स्थानको अवलोकन गर्न सकिन्छ। साथै, रालोङ गुम्बा पनि यहाँबाट करिब एक घण्टाको पैदल यात्रामा पुग्न सकिने अर्को प्रमुख धार्मिक गन्तव्य हो। यी तातोपानी कुण्डहरूले सिक्किमको पर्यटनलाई स्वास्थ्य, प्रकृति र अध्यात्मसँग जोड्दै राज्यलाई अझ आकर्षक पर्यटन गन्तव्यका रूपमा स्थापित गरिरहेको स्थानीय पर्यटन व्यवसायीहरूको भनाइ छ।