बंगलादेशको मैमनसिंह जिल्लामा धार्मिक अपमानको आरोप लगाउँदै एक उत्तेजित भीडले एक युवकको कुटपिट गरी ज्यान लिएको छ । घटना भालुका क्षेत्रअन्तर्गत दुबालिया पाडा इलाकामा बिहीबार राति घटेको बताइएको छ ।
प्रहरीका अनुसार दीपु चन्द्र दास नामका ती युवकलाई स्थानीय भीडले नियन्त्रणमा लिएर सामुहिक रुपमा आक्रमण गरेको थियो । कुटपिटकै क्रममा उनको घटनास्थलमै मृत्यु भएको जनाइएको छ ।
तर घटना यतिमै सीमित रहेन । युवकको ज्यान गइसकेपछि पनि भीड अझै उग्र बनेको र शवलाई रुखमा बाँधेर आगो लगाइएको प्रहरी स्रोतले जनाएको छ । मृतक दीपु एक कपडा कारखानामा काम गर्दै आएको खुलेको छ ।
भालुका प्रहरी चौकीका ड्युटी अफिसर रिपन मियाले सञ्चारमाध्यमसँग भने,
“राति करिब ९ बजेतिर भीडले युवकलाई समातेर कुट्यो । मृत्यु भएपछि पनि शवलाई रुखमा बाँधेर जलाइयो ।”
घटनाप्रति बंगलादेश सरकारका प्रमुख सल्लाहकार मोहम्मद युनुसले कडा शब्दमा निन्दा गरेका छन् । उनले यस्ता खालका हिंसात्मक क्रियाकलाप नयाँ बंगलादेशका लागि अस्वीकार्य रहेको बताउँदै दोषीहरूमाथि कडा कानुनी कारबाही हुने आश्वासन दिएका छन्।
यस घटनापछि बंगलादेशमा अल्पसंख्यक, विशेषगरी हिन्दू समुदाय लक्षित आक्रमण बढ्दै गएको विषयले अन्तर्राष्ट्रिय स्तरमा समेत चिन्ता बढाएको छ । शेख हसिनाको सत्ता पतनपछि देशका विभिन्न भागमा साम्प्रदायिक तनाव चर्कँदै गएको विश्लेषकहरूको भनाइ छ ।
यसैबीच, युवा नेता शरीफ उस्मान हादीको मृत्युपछि बंगलादेशका केही स्थानमा हिंसात्मक प्रदर्शन पनि देखिएको छ । हादी सत्ताविरोधी आन्दोलनका अगुवा नेतामध्ये एक थिए । उनीमाथि ढाकामा गोली प्रहार भएको र उपचारका क्रममा सिंगापुरमा मृत्यु भएको जनाइएको छ ।
