रूङदुङ मुक्ति पुलको जग धस्कियो

मिनरल स्प्रीङ, 7  अगस्त (अनिल जिम्बा ): मिनरल स्प्रीङको सम्पूर्ण क्षेत्रलाई लेबोङ दार्जीलिङ शहर लगायत अन्य स्थानसित सडक मार्गले जोड्ने पान्दाम चियाबारी अनि आङ्खु माझमा अवस्थित रुङदुङ खोलामाथि बनाएको फलामको बेली ब्रिज जसलाई रुङदुङ मुक्ति पुल भनिन्छ उक्त पुलको याङ्खुपट्टिको आधार जग अथवा फाउण्डेशनको ठूलो अंश धस्केर गएको हुनाले स्थानीय मानिसहरू चिन्तित बनेका छन्।पुल जडान गरिएको ठीक मुनिल्लतिर फाउण्डेशन-को ठूलो अंश झरेर खोलामा पसेको हुनाले रुङदुङ खोलाको आधा भाग नै उक्त झरेको हिस्साले ढाकेको छ भने खोला बढेर आएको बेला पानीले आफ्नो दिशा बदलिए सोझै पुल मुनिको अंशलाई ठूलो क्षति पुर्‍याउने सम्भावना बढेर गएको छ।। यसरी पुल मुनिको अंशलाई क्षति पुगेको खण्डमा उक्त मुक्ति पुल धरासयी हुन सक्छ जसले गर्दा यो पुल भएर ओहोर-दोहोर गर्ने सम्पूर्ण जनसाधारण तथा यात्रुहरु प्रभाव पर्न जान्छ यसर्थ यस विषयलाई सम्बन्धित निकायले समयमा नै निरीक्षण गरी उचित पहल गरीदिए राम्रो हुनेछ भनी गाउँवासीको पक्षमा मिनरल स्प्रीङ यांखु निवासी मणिराज राईले सन्चार माध्यमलाई जनाएका छन्। विगत दागोपाप-को समयमा विभागिय रुपमा नै पुलको निरीक्षण रंग पचेरा आदिको कार्य हुन्थ्यो तर अहिले यस्तो केही भएको जस्तो लाग्दैन। विभागले पनि यसको देखरेख गरिदिए अति उत्तम हुनेथियो उनी भन्छन्। पुललाई जडान गरिएको एकापट्टिको  नट बोल्ट पनि निकालिएको तथा हराएको देखिएको छ यसले पुल तथा वाहनहरुको भार वहन गर्ने क्षमतालाई प्रभाव पार्ने हुनाले यो विषय अति निन्दनीय तथा चिन्तित तुल्याउने भएको हूनाले सम्बन्धित विभागले यसप्रति चाँडै पहल गरीदिनु पर्छ भनी उनले भनेका छन्। ज्ञात रहोस रुङदुङ खोलामाथिको यो बेली ब्रिजको निर्माण पश्चात 1 अक्टोबर 1995 सालमा दार्जीलिङ गोर्खा पार्वत्य परिषद्का अध्यक्ष स्वर्गीय सुवास घिसिङले गरेका थिए भने त्यसपछि नै मिनरल स्प्रीङ क्षेत्र सडक मार्गले अन्य स्थानसित जोडिन पुगेको थियो।