सिलगढी र यसको वरपरका क्षेत्रहरू आइतबार अनि सोमबार बिहान यस सिजनको पहिलो पटक बाक्लो कुहिरोले ढाकिएको थियो। बिहान सबेरैदेखि फैलिएको कुहिरोले सम्पूर्ण क्षेत्र आच्छादित हुँदा दृश्य निकै धमिलो भएको थियो। कुहिरोको असरका कारण सवारीसाधनहरूले दिउँसै बत्ती बालेर आवतजावत गर्नुपरेको अवस्था देखियो। चिसो बढेसँगै स्थानीय बासिन्दाहरू खुला स्थानमा आगो ताप्दै देखिए भने कतिपयले तातो चिया पिउँदै जाडो मौसमको मजा लिएका थिए। धेरैजसो मानिसहरू भने शाल, कम्बल ओढेर घरभित्रै बस्न रुचाएका थिए। सिलगढीसँगै जलपाइगुडीको अम्बारी, बेलाकोबा तथा छिमेकी क्षेत्रहरू पनि बिहानदेखि नै बाक्लो कुहिरोले ढाकिएको थियो। कुहिरोका कारण केही असुविधा भए तापनि जाडो यामको आगमनले स्थानीयवासीहरूमा उत्साह देखिएको छ।
