चेक बाउन्स मुद्दामा अभिनेता राजपाल यादवलाई झट्का, 3 महिने जेल सजाय कायम

चेक बाउन्स मुद्दामा अभिनेता राजपाल यादवलाई झट्का, दिल्ली उच्च अदालतद्वारा तीन महिनाको जेल सजाय कायम बलिउड अभिनेता राजपाल यादवलाई चेक बाउन्ससम्बन्धी सातवटा मुद्दामा दोषी ठहर गर्दै दिल्ली उच्च अदालतले तीन महिनाको साधारण कैद सजाय कायम राखेको छ। न्यायाधीश स्वराणा कान्ता शर्माको इजलासले ट्रायल अदालत र सत्र अदालतको फैसला सदर गर्दै यादवले दायर गरेका पुनरावेदन निवेदनहरू खारेज गरेको हो। अदालतले सातवटै मुद्दामा तीन–तीन महिनाको सजाय सुनाए पनि सबै सजाय एकैसाथ (Concurrent) चल्ने आदेश दिएको छ। साथै, राजपाल यादवलाई प्रत्येक मुद्दामा उजुरीकर्तालाई करिब १ करोड ५ लाख रुपैयाँ क्षतिपूर्ति तिर्न र राज्यलाई २५ हजार रुपैयाँ जरिवाना बुझाउन पनि आदेश दिएको छ। यसअघि उनले बुझाइसकेको करिब २.२५ करोड रुपैयाँ अन्तिम रकममा समायोजन गरिने अदालतले स्पष्ट पारेको छ। यो मुद्दा सन् २०१० मा राजपाल यादवले आफ्नो निर्देशनमा बनेको फिल्म ‘अता पता लापता’ निर्माणका लागि लिएको ऋणसँग सम्बन्धित हो। ऋण तिर्नका लागि जारी गरिएका चेकहरू बैंकबाट अस्वीकृत भएपछि उनीविरुद्ध नेगोसिएबल इन्स्ट्रुमेन्ट्स ऐन अन्तर्गत चेक बाउन्सका मुद्दा दायर भएका थिए। समयमै रकम भुक्तानी नगर्दा ब्याज र अन्य शुल्क थपिँदै बक्यौता रकम झन्डै ९ करोड रुपैयाँ पुगेको बताइएको छ।अदालतले यादवलाई पटक–पटक भुक्तानी गर्ने अवसर दिइएको भए पनि उनले आफ्नो प्रतिबद्धता पूरा गर्न असफल भएको उल्लेख गरेको छ। फैसलामा अदालतले “कानुन कुनै अभिनेताको इच्छाअनुसार फेरबदल गर्न मिल्ने चलचित्रको स्क्रिप्ट होइन” भन्दै न्यायिक आदेशको पालना गर्नुपर्नेमा जोड दिएको छ।  यसैबीच, अदालतले यादवलाई माथिल्लो अदालतमा अपिल गर्ने अवसर दिन सजाय कार्यान्वयनमा दुई महिनाको समय दिएको छ। यदि निर्धारित अवधिभित्र अपिल दर्ता गरिएन भने अदालतको आदेशअनुसार तीन महिनाको कैद सजाय कार्यान्वयन हुनेछ।