मध्यपूर्वमा युद्धविरामपछि केही समय शान्त देखिएको अवस्था फेरि तनावपूर्ण बनेको छ। हर्मुज जलडमरूमध्यलाई केन्द्रमा राख्दै अमेरिका र इरानबीच सैन्य गतिविधि तीव्र बनेका छन्। अमेरिकी राष्ट्रपति डोनाल्ड ट्रम्पले इरानले युद्धविरामका सर्त पूर्ण रूपमा पालना नगरेको आरोप लगाउँदै आवश्यक परे थप कडा सैन्य कारबाही गरिने चेतावनी दिएका छन्। त्यससँगै दुवै पक्षबीचको तनाव पुनः चुलिएको छ। अमेरिकी अधिकारीहरूका अनुसार वाशिङ्टनले इरानलाई हर्मुज जलडमरूमध्य हुँदै सञ्चालन हुने अन्तर्राष्ट्रिय व्यापारिक तथा तेल बोकेका जहाजमाथिको आक्रमण तत्काल रोक्ने सार्वजनिक प्रतिबद्धता जनाउन दबाब दिएको छ। अमेरिकी पक्षले यस्तो प्रतिबद्धताले मात्रै क्षेत्रीय स्थायित्व कायम हुने र कूटनीतिक वार्ताका लागि विश्वासको वातावरण बन्ने जनाएको छ।
इरानले भने आफ्नो राष्ट्रिय सुरक्षा र सार्वभौमिकतामाथि कुनै सम्झौता नगर्ने स्पष्ट पार्दै अमेरिकी दबाब अस्वीकार गरेको छ। इरानी अधिकारीहरूले हर्मुज जलडमरूमध्यमा आफ्नो सुरक्षा हितलाई असर पुग्ने कुनै पनि गतिविधिको कडा प्रतिकार गरिने चेतावनी दिएका छन्। साथै, अमेरिकी सैन्य उपस्थितिलाई क्षेत्रीय अस्थिरताको मुख्य कारण भएको आरोप पनि लगाएका छन्। यसैबीच, ओमानको मध्यस्थतामा अमेरिका र इरानबीच अप्रत्यक्ष कूटनीतिक वार्ता जारी रहेको जनाइएको छ। वार्तामा समुद्री सुरक्षाका साथै इरानको आणविक कार्यक्रम, प्रतिबन्ध तथा क्षेत्रीय सुरक्षासम्बन्धी विषयमा छलफल भइरहेको अन्तर्राष्ट्रिय सञ्चारमाध्यमहरूले उल्लेख गरेका छन्। यद्यपि, दुवै पक्षबीच अझै कुनै ठोस सहमति हुन सकेको छैन। विश्वको करिब २० प्रतिशत कच्चा तेल हर्मुज जलडमरूमध्य हुँदै ओसारपसार हुने भएकाले त्यहाँ बढ्दो तनावले अन्तर्राष्ट्रिय ऊर्जा बजार, समुद्री व्यापार र विश्व अर्थतन्त्रमा गम्भीर असर पर्ने चिन्ता बढेको छ। विभिन्न मुलुकहरूले आफ्ना व्यापारिक जहाजलाई उच्च सतर्कता अपनाउन निर्देशन दिएका छन् भने अन्तर्राष्ट्रिय समुदायले दुवै पक्षलाई संयमता अपनाउँदै वार्तामार्फत विवाद समाधान गर्न आग्रह गरेको छ।
