6 माइल–रिसाप सडक निर्माणमा धाँधलीको आरोप, 1 करोड 19 लाखको योजनामा 10% प्रतिशत पनि काम नभएको स्थानीयको दाबी:सभासद कुमार शर्मा किन मौन?
कालेबुङ 38 नम्बर समष्टि अन्तर्गत 6 माइलदेखि रिसापसम्म निर्माणाधीन सडक योजनामा धाँधली भएको आरोप स्थानीयवासी अशोक राईले लगाएका छन्। उनका अनुसार करिब 1 करोड 19 लाख रुपैयाँ लागतको उक्त सडक निर्माणमा 10% प्रतिशत पनि काम नभएको, अर्थात 5 लाख रुपैयाँ बराबरको पनि काम सम्पन्न नभएको दाबी गरेका छन्।
उक्त सडक निर्माण कार्य WBSRDA मार्फत SDRF (State Disaster Response Fund) तथा NDRF (National Disaster Response Fund) को आर्थिक सहयोगमा सञ्चालन भइरहेको जानकारी सार्वजनिक गरिएको छ।
स्थानीयवासी अशोक राईले 38 नम्बर समष्टिका सभासद कुमार शर्मालाई जनताले विकास र जनहितका लागि निर्वाचित गरेको उल्लेख गर्दै, निर्माण कार्यमा भएको भनिएको अनियमितताबारे स्पष्ट जवाफ दिन आग्रह गरेका छन्। उनले उक्त सडक निर्माणमा वास्तवमै धाँधली भएको हो वा अन्य कुनै कारणले काम अघि नबढेको हो भन्ने विषयमा सम्बन्धित पक्षले जनतालाई जानकारी गराउनुपर्ने बताएका छन्।
स्मरण रहोस्, हिजो 16 जुलाई 2016 को दिन इण्डियन गोर्खा जनशक्ति फ्रन्ट केन्द्रीय प्रवक्ता श्याम गौतमले पेदोङ खण्डमा WBSRDA मार्फत SDRF (State Disaster Response Fund) तथा NDRF (National Disaster Response Fund) मार्फत आएको 19 करोड रूपियाको सड़क निर्माण कार्यको विवरण सर्वजनिक गरेपछि एका-एक यस्तो कार्यहरू सर्वजनिक हुन थालेका छन्।
