एनबीएसटीसी बस फ्लाइओभरको खम्बामा ठोक्कियो, एक पैदलयात्रीको मृत्यु

बागडोग्रामा उत्तर बङ्ग राज्य यातायात निगम (एनबीएसटीसी) को एक यात्रुवाहक बस यान्त्रिक खराबी भएको आशंकापछि अनियन्त्रित भई फ्लाइओभरको खम्बामा ठोक्किँदा एक पैदलयात्रीको मृत्यु भएको छ। दुर्घटनामा बसमा सवार केही यात्रु सामान्य घाइते भएका छन्।  प्राप्त जानकारीअनुसार बस सडकमा गुडिरहेका बेला अचानक यान्त्रिक समस्या देखिएपछि चालकले बसमाथिको नियन्त्रण गुमाएका थिए। त्यसपछि बस सडक किनारतर्फ मोडिँदै फ्लाइओभरको खम्बामा ठोक्किएको थियो। सोही क्रममा सडकबाट हिँडिरहेका एक पैदलयात्री बसको ठक्करमा परी घटनास्थलमै मृत्यु भएको प्रहरीले जनाएको छ।  दुर्घटनापछि स्थानीयवासी, बागडोग्रा प्रहरी तथा उद्धारकर्मी तत्काल घटनास्थलमा पुगेर घाइतेहरूको उद्धार गरेका थिए। घाइतेहरूलाई उपचारका लागि नजिकैको अस्पताल पठाइएको छ। दुर्घटनापछि केही समय उक्त क्षेत्रमा सवारी आवागमन प्रभावित भएको थियो भने प्रहरीले ट्राफिक व्यवस्थापन गर्दै बसलाई हटाएर सडक सञ्चालनमा ल्याएको जनाएको छ।प्रहरीले दुर्घटनाको वास्तविक कारण पत्ता लगाउन अनुसन्धान सुरु गरेको छ। प्रारम्भिक रूपमा बसमा यान्त्रिक खराबी आएको आशंका गरिए पनि प्राविधिक परीक्षणपछि मात्रै दुर्घटनाको वास्तविक कारण स्पष्ट हुने अधिकारीहरूले बताएका छन्।