●खेलकुद

 सैयद मुश्ताक अली ट्रफी २०२५ को फाइनलमा झारखण्डले हरियाणालाई पराजित गर्दै पहिलोपटक यो प्रतिष्ठित घरेलु टी–२० प्रतियोगिताको उपाधि जितेको छ। ईशान किशनको कप्तानीमा झारखण्डले ६९ रनको शानदार जित दर्ता गर्दै इतिहास रच्यो। टस हारेर पहिले ब्याटिङको निम्तो पाएको झारखण्डले निर्धारित २० ओभरमा ३ विकेट गुमाउँदै विशाल २६२ रन बनायो। जवाफमा हरियाणाको टोली १८.३ ओभरमै १९३ रनमा समेटियो। झारखण्डको सुरुआत भने खासै राम्रो रहेन। विराट सिंह २ रनमै आउट भए। त्यसपछि कप्तान ईशान किशन र कुमार कुशाग्राले आक्रामक ब्याटिङ्ग गर्दै टोलीलाई मजबुत स्थितिमा पुर्‍याए। ईशान किशनले ४९ बलमा १० छक्का र ६ चौकाको सहयोगमा १०१ रनको शानदार शतकीय पारी खेले। उनी सैयद मुश्ताक अली ट्रफीको फाइनलमा शतक बनाउने पहिलो कप्तान बने। कुमार कुशाग्राले ३८ बलमा ५ छक्का र ८ चौकासहित ८१ रनको प्रभावशाली पारी खेले। अन्त्यतिर अनुकूल रोयले नटआउट ४० रन र रोबिन मिन्जले नटआउट ३१ रन बनाए। हरियाणाका तर्फबाट तीन बलरले समान एक–एक विकेट लिए। अर्कोतिर २६३ रनको लक्ष्य पछ्याउन मैदानमा उत्रिएको हरियाणाको सुरुआत नै कमजोर रह्यो। टोलीका कप्तान तथा प्रतियोगितामा दोस्रो सर्वाधिक रन बनाएका अंकित कुमार शून्यमा आउट भए। आशीष सिवाच पनि डकमा पवेलियन फर्किए। त्यसपछि अर्श रंगा र यशवर्धन दलालले पारी सम्हाल्ने प्रयास गरे तर रंगा १७ रनमा सुशान्त मिश्राको बलमा बोल्ड भए। पावरप्ले समाप्त हुँदा हरियाणाले ५८ रन बनाए पनि ३ महत्वपूर्ण विकेट गुमाइसकेको थियो। चौथो विकेटका लागि निशान्त सिन्धु र यशवर्धन दलालबीच ६७ रनको साझेदारी भयो, जसका कारण टोलीको स्कोर १०० पार पुग्यो। दलाल ५८ रन र सिन्धु ३१ रनमा आउट भएपछि हरियाणाको पारी धेरै समय टिक्न सकेन। झारखण्डका लागि सुशान्त मिश्रा र बाल कृष्णाले ३–३ विकेट लिए भने विकास सिंह र अनुकूल रोयले २–२ विकेट हात पारे। उल्लेखनीय कुरा के हो भने, २०१०–११ सिजनमा विजय हजारे ट्रफी जितेपछि झारखण्डको यो दोस्रो घरेलु उपाधि हो। ईशान किशनको नेतृत्वमा झारखण्डले सैयद मुश्ताक अली ट्रफी जित्दै नयाँ इतिहास कायम गरेको छ।