भारतीय गोर्खा परिसंघ (भा.गो.प.), असम राज्य समितिले मंगलबार आफ्नी संस्थापक अध्यक्षा पद्मश्री गीता उपाध्यायप्रति अन्तिम श्रद्धाञ्जली अर्पण गरेको छ। उहाँको सोमबार राति करिब ९:१० बजे उमेरजन्य अस्वस्थताका कारण तेजपुरको चाँदमारीस्थित आफ्नै निवासमा ८७ वर्षको उमेरमा निधन भएको थियो। भारतीय गोर्खा परिसंघ, असम राज्य समितिका कार्यकारी अध्यक्ष श्रीठण्डी नेवारको नेतृत्वमा, शोणितपुर जिल्ला अध्यक्ष गौड बहादुर छेत्री, जिल्ला मूलसचिव मुक्तिनाथ लुइँटेल, राज्य कार्यकारिणी सदस्य गणेश पौड्याल, असम प्रान्तका प्रतिष्ठापक मुलसचिव प्रवीण राई, शोणितपुर जिल्ला समितिका कार्यकरी अध्यक्ष हिम सागर उपाध्याय, जिल्ला कार्यकारी सदस्य मानिक सापकोटा, रत्नेश्वर नेवार, कमल उपाध्याय, महेन्द्र उपाध्याय, डा० अमर गौतम, देव कुमार शर्मा, मोहन सुवेदी, खड्ग बहादुर कौशिक, दीननाथ निराला, खेमानन्द मिश्र, आजीवन सदस्य मित्रदेव शर्मा, आमन्त्रित मेडिया सदस्य बेदान्त गहतराजको साथै अन्य धेरै शुभाकांक्षीको उपस्थिति लगायत अन्य पदाधिकारीहरू सहित प्रतिनिधिमण्डलले चाँदमारीस्थित उहाँको निवासमा पुगेर श्रद्धाञ्जली अर्पण गर्नुका साथै शोकसन्तप्त परिवारप्रति समवेदना व्यक्त गरियो।आफ्नी असम राज्य संस्थापक अध्यक्षाप्रति संगठनको सर्वोच्च सम्मान प्रकट गर्दै प्रतिनिधिमण्डलले उहाँको पार्थिव शरीर राखिएको काँचको शवपेटिकामाथि भारतीय गोर्खा परिसंघको झण्डा ओढाई श्रद्धाञ्जली अर्पण गरेको थियो। त्यसपछि उपस्थित सबैले एक मिनेट मौनधारण गर्दै दिवङ्गत आत्माप्रति श्रद्धाञ्जली अर्पण गरे। यस अवसरमा वक्ताहरूले संगठनको स्थापना, विस्तार तथा भारतीय गोर्खा समुदायको उत्थानमा उहाँले पुर्याउनुभएको अतुलनीय योगदानको स्मरण गरेका थिए। पद्मश्री गीता उपाध्याय असम तथा भारतीय गोर्खा समुदायका सर्वाधिक सम्मानित साहित्यिक व्यक्तित्वमध्ये एक हुनुहुन्थ्यो। उहाँको जन्म १४ फेब्रुअरी १९३९ मा तत्कालीन दराङ जिल्ला (हाल बिश्वनाथ जिल्ला), असमको गाङमौथानमा भएको थियो। उहाँ भारतको स्वतन्त्रता आन्दोलनका अग्रणी योद्धा तथा असम प्रदेश कांग्रेस समितिका प्रथम निर्वाचित अध्यक्ष बाबू छविलाल उपाध्यायका नातिनी हुनुहुन्थ्यो। एक प्रतिष्ठित शिक्षाविद्का रूपमा उहाँ शिवसागर महाविद्यालयको राजनीतिशास्त्र विभागको विभागाध्यक्ष पदबाट अवकाश प्राप्त गर्नुभएको थियो। उहाँ असमका गोर्खा समुदायबाट स्नातकोत्तर उपाधि हासिल गर्ने पहिलो महिला पनि हुनुहुन्थ्यो, जसले गोर्खा महिलाको उच्च शिक्षाको क्षेत्रमा ऐतिहासिक कीर्तिमान कायम गर्नुभयो।
नेपाली तथा असमिया साहित्यमा उहाँको योगदान राष्ट्रिय रूपमा प्रशंसित छ। उहाँले सन् २०१२ मा असमिया कृति कारेङगर लिगिरी लाई नेपालीमा दरबारकी सुसार शीर्षकमा अनुवाद गरेबापत साहित्य अकादेमी अनुवाद पुरस्कार प्राप्त गर्नुभएको थियो। त्यसैगरी सन् २०१६ मा आफ्ना हजुरबुबा बाबू छविलाल उपाध्यायको जीवन र संघर्षमा आधारित नेपाली उपन्यास जन्मभूमि मेरो स्वदेश का लागि साहित्य अकादेमी पुरस्कारबाट सम्मानित हुनुभएको थियो। साहित्य, शिक्षा तथा समाजप्रतिको उहाँको असाधारण योगदानको कदर गर्दै भारत सरकारले सन् २०२५ मा उहाँलाई देशको चौथो सर्वोच्च नागरिक सम्मान ‘पद्मश्री’ प्रदान गरेको थियो। यसै वर्ष **असम सरकारले उहाँलाई प्रतिष्ठित ‘सती साधनी पुरस्कार’**बाट पनि सम्मानित गरेको थियो। भारतीय गोर्खा समुदायप्रतिको उहाँको आजीवन योगदानको सम्मानस्वरूप भारतीय गोर्खा परिसंघले सन् २०२४ मा कार्बी आङ्लोङको दिफुमा सम्पन्न २४औँ राष्ट्रिय परिषद् बैठकमा उहाँलाई ‘राष्ट्रिय गोर्खा गौरव सम्मान’ प्रदान गरेको थियो।प्रख्यात साहित्यकार, अनुवादक तथा शिक्षाविद्का अतिरिक्त गीता उपाध्याय एक अग्रणी समाजसेवी पनि हुनुहुन्थ्यो। उहाँ भारतीय गोर्खा परिसंघ, असम राज्य समितिकी संस्थापक अध्यक्षा हुनुहुन्थ्यो र उहाँकै दूरदर्शी नेतृत्वमा संगठनले भारतीय गोर्खा समुदायको एकता, पहिचान, सम्मान तथा संवैधानिक अधिकारको संरक्षणका लागि बलियो आधार निर्माण गरेको थियो। उहाँको निधनप्रति गहिरो दुःख व्यक्त गर्दै मुख्यमन्त्री डा. हिमन्त बिश्व शर्माले उहाँलाई असमिया र नेपाली साहित्यलाई समृद्ध बनाउने विशिष्ट शिक्षाविद् तथा प्रख्यात साहित्यकारका रूपमा स्मरण गर्नुभएको छ। उहाँले गीता उपाध्यायको प्रेरणादायी योगदानले भावी पुस्तालाई सदैव मार्गदर्शन गर्ने विश्वास व्यक्त गर्दै शोकसन्तप्त परिवार, शुभेच्छुक तथा प्रशंसकहरूप्रति हार्दिक समवेदना व्यक्त गर्नुभएको छ। यसैबीच, भारतीय गोर्खा परिसंघ, असम राज्य समितिका मूलसचिव नन्द किराती देवानले संस्थापक अध्यक्ष गीता उपाध्यायको सम्मानमा एक साताको शोक अवधि घोषणा गरिएको जानकारी दिनुभएको छ। शोणितपुर जिल्ला प्रशासनका अनुसार पद्मश्री गीता उपाध्यायको बुधबार, १५ जुलाई २०२६ बिहान तेजपुरमा पूर्ण राजकीय सम्मानका साथ अन्त्येष्टि गरिनेछ। भारतीय गोर्खा परिसंघका राष्ट्रिय अध्यक्ष नित्यानन्द उपाध्याय, उत्तर–पूर्व क्षेत्रीय अध्यक्ष डा. दिलीप छेत्री, असम राज्य अध्यक्ष अमर अधिकारी, कार्यकारी अध्यक्ष ठण्डी नेवार, वरिष्ठ उपाध्यक्ष खेम प्रधान, मूलसचिव नन्द किराती देवान लगायत विभिन्न जिल्लाका पदाधिकारीहरू अन्त्येष्टि तथा अन्तिम श्रद्धाञ्जली कार्यक्रममा सहभागी हुने अपेक्षा गरिएको छ। पद्मश्री गीता उपाध्यायको निधनसँगै भारतीय गोर्खा जातिले एक युगप्रवर्तक साहित्यकार, प्रख्यात शिक्षाविद्, दूरदर्शी संगठन निर्माता तथा समर्पित समाजसेवीलाई गुमाएको छ। उहाँका आदर्श, साहित्यिक योगदान र समाजसेवाप्रतिको आजीवन समर्पण भावी पुस्ताका लागि सदैव प्रेरणाको दीप बनेर रहनेछन।
