वार्ड नम्बर 13 मा नयाँ हेल्थ सेन्टर निर्माणको लागि शिलान्यास

खरसाङ, 25 जुलाई (निसं)ः खरसाङ नगरपालिकामा 35 बेडको अस्पताल निर्माणको लागि शिलान्यास कार्य सम्पन्न गरिएको छ। नगरपालिकाको वार्ड नम्बर 13 मा अरबन पब्लिक हेल्थ सेन्टरको निर्माणको लागि शिलान्यास कार्य सम्पन्न गरिएको हो। खरसाङ नगरपालिका क्षेत्रमा बढ़िरहेको जनसंख्यालाई ध्यानमा राखेर जनसाधारणलाई स्वास्थ्य सुविधा प्रदान गर्नको लागि खरसाङ नगरपालिकाको तर्फबाट 35 वटा बेड भएको स्वस्थ्य केन्द्र निर्माणको निम्ति शिलान्यास गरिएको छ। उक्त शिलान्यास कार्यक्रममा खरसाङ महकुमा अधिकारी आईएएस बिन्दबासिनी तेजा दिपक, सभासद श्याम शेर्पा, खरसाङ नगरपालिका प्रशासनिक बोर्डका अध्यक्ष ब्रिगेन गुरुङ, उपाध्यक्ष सुवास प्रधान, भागोप्रमो युवा शक्ति खरसाङ महकुमा समिति अध्यक्ष प्रेमेन्द्र गुरूङ लगायत अन्य पदाधिकारीहरु र समाजका प्रतिनिधिहरु उपस्थित थिए। उक्त स्वास्थ्य केन्द्रको निर्माण खर्च 89 लाख 60 हजार रुपियाँ रहेको बताइएको छ। यसको क्षेत्रफल 15 वर्ग फिट रहेको र यसको निर्माण कार्य एक वर्षभित्रमा पूरा गरिने बताइएको छ। यसको साथै बिहानको समय खरसाङ्को एसबी डे टीबी सेनिटोरियम क्षेत्रमा पाईखानाको मरमत्ति कार्य पनि शुरु गरिएको छ। यसको लागत खर्च 5 लाख 50 हजार रहेको जानकारी प्राप्त भएको छ। खरसाङ्को वार्ड नम्बर 13 मा शिलान्यास गरिएको 35 बेडको स्वास्थ्य केन्द्रको विषयमा पत्रकारहरुसित कुराकानी गर्दै खरसाङ नगरपालिका प्रशासनिक बोर्डका अध्यक्ष ब्रिगेन गुरुङले खरसाङ नगरपालिका क्षेत्रमा बढ़िरहेको जनसंख्यालाई ध्यानमा राखेर नयाँ अस्पताल निर्माणको लागि शिलान्यास कार्य सम्पन्न गरिएको बताए। उनले नगरपालिकाले मानिसहरुका स्वास्थ्य विषयमा काम गरिरहेको र यसै विषयलाई ध्यानमा राखेर खरसाङ्को वार्ड नम्बर 13 मा नयाँ अस्पताल निर्माणको लागि शिलान्यास कार्य सम्पन्न गरिएको बताए। यस नयाँ अस्पताल भवनमा 35 वटा बेड रहने र यो अस्पताल सञ्चालनमा आएपछि स्थानीयहरुलाई धेरै सुविधा हुने बताए।