जीटीएको आधिकारिक पत्राचारमा किन त्रुटि र लापरवाही देखिएको छ?

आज गोरखाल्याण्ड क्षेत्रीय प्रशासन (GTA) का प्रमुख अनित थापाको निर्देशनमा जी टी ए सचिवद्वारा चना दाल प्रकरण सम्बन्धमा स्पष्टिकरण माग गर्दै NCCF र NAFED का Managing Director हरूसँग आधिकारिक पत्राचार भएको जानकारी प्राप्त भएको छ। तर उक्त पत्रमा जी टी ए को आधिकारिक लोगो/प्रतिक/चिन्ह नदेखिनु अत्यन्तै गम्भीर र आपत्तिजनक विषय हो। जी टी ए को आधिकारिक लोगो/प्रतिक/चिन्ह कहिले र कसको निर्णयबाट परिवर्तन गरियो? छुट्टै राज्य गोर्खाल्याण्डको दीर्घ संघर्षको यात्रामा दा गो पा प देखि जी टी ए सम्म आइपुग्न असंख्य बलिदान, त्याग र पीडाको इतिहास जोडिएको छ। सयौं सिन्दूर पुछिएका, असंख्य कोख रित्तिएका, जेल-नेल, अन्याय, अत्याचार र दमनको कठोर यथार्थ बोकेको यो प्रतिक हाम्रो पहिचान, अस्तित्व र स्वाभिमानसँग प्रत्यक्ष रूपमा गाँसिएको छ। यस्तो संवेदनशील र ऐतिहासिक महत्व बोकेको प्रतिकलाई यति सहज रूपमा किन र कसरी बेवास्ता गरियो? चना दाल प्रकरणसँग सम्बन्धित सुरुदेखि अहिलेसम्मका आधिकारिक पत्राचारमा किन यति धेरै त्रुटि र लापरवाही देखिएको छ? यस विषयमा सम्बन्धित निकायबाट तत्काल स्पष्ट, पारदर्शी र जिम्मेवार जवाफको माग आई जी जे एफ प्रवक्ता, लाडुप घिसिङले गरेका छन्।