विवेक ओबेरोयको ३० कम्पनीमा लगानी, ३०० % सम्म प्रतिफल   

बलिउड अभिनेता तथा उद्यमी विवेक ओबेरोयले आफ्नो पारिवारिक लगानी संस्था (फ्यामिली अफिस) मार्फत ३० भन्दा बढी कम्पनीमा लगानी गरेको र तीमध्ये ११ वटा कम्पनीबाट सफलतापूर्वक बाहिरिँदा ३०० प्रतिशतसम्म प्रतिफल प्राप्त गरेको खुलासा गरेका छन्। उनले अभिनयसँगै व्यवसाय र लगानीलाई पनि आफ्नो करियरको महत्वपूर्ण हिस्सा बनाएको बताउँदै दीर्घकालीन सोच, सही निर्णय र धैर्यले ठूलो सफलता दिलाएको अनुभव साझा गरे। एक अन्तर्वार्ताका क्रममा ओबेरोयले कुनै पनि व्यवसायको मूल उद्देश्य नाफा कमाउनु नै भए पनि त्यससँगै समाजमा सकारात्मक प्रभाव पार्ने, रोजगारी सिर्जना गर्ने र नवीन सोच भएका उद्यमीलाई साथ दिने लक्ष्य पनि उत्तिकै महत्वपूर्ण रहेको बताए। “हरेक व्यवसायको धर्म नाफा हो,” भन्दै उनले नाफालाई नै व्यवसायको दिगोपन र विस्तारको आधारका रूपमा व्याख्या गरे। उनका अनुसार आफ्नो फ्यामिली अफिसले प्रविधि, फिनटेक, हेल्थटेक, उपभोक्ता सेवा, शिक्षा, आतिथ्य तथा अन्य सम्भावनायुक्त क्षेत्रमा काम गरिरहेका स्टार्टअप र उदीयमान कम्पनीहरूमा लगानी गर्दै आएको छ। लगानी गर्दा केवल तत्काल नाफाभन्दा पनि कम्पनीको दीर्घकालीन सम्भावना, व्यवस्थापन टोलीको क्षमता, नवप्रवर्तन र बजारमा प्रभाव सिर्जना गर्ने क्षमतालाई प्राथमिकता दिने उनले बताए।ओबेरोयले सानै उमेरदेखि पैसाको महत्व बुझ्दै वित्तीय अनुशासन अपनाएको उल्लेख गर्दै अभिनयबाट कमाएको आम्दानीलाई योजनाबद्ध रूपमा विभिन्न व्यवसाय र स्टार्टअपमा लगानी गरेको जानकारी दिए। उनका अनुसार सही समयमा गरिएको लगानी, जोखिम व्यवस्थापन र धैर्य नै सफलताको मुख्य आधार बनेका छन्। अभिनेताका रूपमा लोकप्रियता हासिल गरे पनि व्यवसाय र लगानीबाट सिर्जना हुने मूल्य र दीर्घकालीन सम्पत्ति निर्माणले आफूलाई फरक किसिमको सन्तुष्टि दिएको उनले बताए। भारतको स्टार्टअप इकोसिस्टमप्रति विश्वास व्यक्त गर्दै उनले नयाँ उद्यमीहरूलाई स्पष्ट दृष्टिकोण, बलियो व्यवसायिक योजना र दीर्घकालीन सोचका साथ अघि बढ्न सुझाव दिएका छन्।