आलिया भट्ट र शरवरी अभिनीत बहुप्रतीक्षित स्पाइ–एक्सन फिल्म ‘अल्फा’ 

आलिया भट्ट र शरवरी अभिनीत बहुप्रतीक्षित स्पाइ–एक्सन फिल्म ‘अल्फा’ शुक्रबारदेखि विश्वभर प्रदर्शनमा आएको छ। यशराज फिल्म्स (YRF) को चर्चित स्पाइ युनिभर्सअन्तर्गत निर्माण भएको यो पहिलो महिला–केन्द्रित स्पाइ फिल्म हो। शिव रवैलको निर्देशन तथा आदित्य चोप्राको निर्माणमा बनेको फिल्ममा आलिया भट्ट र शरवरी मुख्य भूमिकामा छन् भने बबी देओल खलनायकको भूमिकामा देखिएका छन्। अनिल कपुरको पनि महत्वपूर्ण भूमिका रहेको फिल्ममा ऋतिक रोशनको विशेष उपस्थितिले दर्शकमाझ थप उत्साह सिर्जना गरेको छ। प्रदर्शनअघि नै उत्कृष्ट एक्सन दृश्य, उच्चस्तरीय निर्माण र स्टार कलाकारका कारण ‘अल्फा’ वर्षकै बहुप्रतीक्षित बलिउड फिल्ममध्ये एक बनेको थियो। व्यापार विश्लेषकहरूका अनुसार फिल्मले प्रदर्शनअघि भारतभर करिब ११ हजारभन्दा बढी टिकट बिक्री गर्दै करिब ४४.८९ लाख भारतीय रुपैयाँ बराबरको अग्रिम बुकिङ गरेको थियो। प्रदर्शनसँगै सामाजिक सञ्जालमा आएका प्रारम्भिक प्रतिक्रियामा फिल्मका एक्सन दृश्य, शरवरीको अभिनय र ऋतिक रोशनको विशेष उपस्थितिको प्रशंसा गरिएको छ। यद्यपि केही दर्शकले कथावस्तु र पटकथालाई अपेक्षाअनुसार प्रभावशाली नरहेको प्रतिक्रिया दिएका छन्। अब ‘अल्फा’को पहिलो सप्ताहन्तको बक्स अफिस प्रदर्शनले यसको व्यावसायिक सफलता र यशराज स्पाइ युनिभर्सका आगामी परियोजनामा पर्ने प्रभाव निर्धारण गर्ने अपेक्षा गरिएको छ।