अरुणाचल प्रदेशको चाङ्लाङ जिल्लाअन्तर्गत नामपोङ निवासी प्रतिभाशाली फुटबल खेलाडी विवेक गुरुङले आफ्नो उत्कृष्ट खेल प्रदर्शनलाई निरन्तरता दिँदै जोरहाट सुपर डिभिजन फुटबल लिग–२०२६ को बहुप्रतिष्ठित उपाधि जित्न सफल भएका छन्। फाइनल खेलमा जोरहाट टाउन क्लबले जोरहाट भिक्टोरियस एफसीलाई ५–२ गोलअन्तरले पराजित गर्दै शानदार जित हासिल गर्दा विवेक गुरुङले खेलको सुरुमै पहिलो गोल गर्दै टोलीलाई उत्कृष्ट सुरुआत दिलाएका थिए। प्रतियोगिताभर उनले केवल चार खेलमा पाँच गोल गर्दै आफ्नो उत्कृष्ट गोल स्कोरिङ क्षमता पुनः प्रमाणित गरे।
यो सफलता विवेक गुरुङका लागि व्यक्तिगत रूपमा पनि ऐतिहासिक बनेको छ। उनले २०१७, २०१९, २०२२, २०२५ र २०२६ गरी पाँच पटक जोरहाट सुपर डिभिजन फुटबल लिगमा सहभागिता जनाएका छन्, र आश्चर्यजनक रूपमा पाँचै पटक च्याम्पियन टोलीका सदस्य बन्न सफल भएका छन्। यस्तो निरन्तर सफलताले उनलाई उत्तर–पूर्व भारतका सर्वाधिक सफल फुटबलरमध्ये एकका रूपमा स्थापित गरेको छ।
यसअघि पनि विवेक गुरुङले इन्द्रजित नामचुम अरुणाचल लिग–२०२५ मा क्यापिटल कम्प्लेक्स एफसीबाट खेल्दै १३ गोल, ४ पटक प्लेयर अफ द म्याच, २ ह्याट्रिकसहित गोल्डेन बुट तथा ₹५०,००० नगद पुरस्कार जितेर आफ्नो असाधारण प्रतिभाको परिचय दिएका थिए। नामपोङको सामान्य परिवेशबाट सुरु भएको उहाँको फुटबल यात्रा आज हजारौँ युवा खेलाडीका लागि प्रेरणाको स्रोत बनेको छ।
उपाधि जितेपछि विवेक गुरुङले आफ्नो सफलताको श्रेय भगवान् र आफ्ना शुभेच्छुकहरूलाई दिँदै भन्नुभयो, “म सर्वप्रथम भगवानप्रति आभारी छु। अहिलेसम्म मलाई साथ, माया र हौसला दिने सम्पूर्ण शुभेच्छुकहरूलाई हृदयदेखि धन्यवाद दिन चाहन्छु। आगामी दिनहरूमा पनि तपाईंहरूको साथ, माया र आशीर्वाद यस्तै रहिरहोस् भन्ने अपेक्षा गर्दछु।” निरन्तर उत्कृष्ट प्रदर्शन, अनुशासन, अथक मेहनत र खेलप्रतिको समर्पणका कारण विवेक गुरुङ आज अरुणाचल प्रदेशका मात्र होइन, सम्पूर्ण भारतीय गोरखा समुदायका गौरवशाली फुटबल खेलाडीका रूपमा परिचित बनेका छन्।
