वाङचुकको स्वास्थ्य अवस्था चिन्ताजनक, भोक हड्ताल अन्त्य गर्न अपील

सोनम वाङचुकको स्वास्थ्य अवस्था चिन्ताजनक, भोक हड्ताल अन्त्य गर्न राजनीतिक दल र नेताहरूको आग्रह। शिक्षा सुधारको मागसहित जारी आन्दोलनलाई समर्थन गर्दै अनिश्चितकालीन भोक हड्तालमा बसेका शिक्षाविद् तथा वातावरण अभियन्ता सोनम वाङचुकको स्वास्थ्य अवस्था गम्भीर बन्दै गएको छ। भोक हड्ताल १७औँ दिनमा प्रवेश गरेसँगै विभिन्न राजनीतिक दलका नेता तथा सामाजिक अभियन्ताहरूले उनको जीवन जोखिममा परेको भन्दै तत्काल भोक हड्ताल अन्त्य गर्न आग्रह गरेका छन्।दिल्लीको जन्तर–मन्तरमा जारी आन्दोलनको नेतृत्व गरिरहेको ककरोच जनता पार्टी (CJP) का संस्थापक अभिजित दिप्केले वाङचुकको स्वास्थ्य निरन्तर कमजोर बन्दै गएको बताएका छन्। उनका अनुसार वाङचुकको तौल उल्लेख्य रूपमा घटेको छ र चिकित्सकहरूले स्वास्थ्य अवस्थाप्रति गम्भीर चिन्ता व्यक्त गरेका छन्। आन्दोलनकारीहरूले केन्द्रीय शिक्षा मन्त्री धर्मेन्द्र प्रधानको राजीनामाको माग गर्दै आन्दोलनलाई निरन्तरता दिएका छन्। तृणमूल कांग्रेसकी सांसद महुआ मोइत्रा, शिवसेना (यूबीटी) प्रमुख उद्धव ठाकरेलगायत विपक्षी नेताहरूले सरकारले वाङचुकको मागप्रति संवेदनशील बन्नुपर्ने र उनको ज्यान जोखिममा पार्ने अवस्था सिर्जना हुन नदिन संवादको माध्यमबाट समाधान खोज्नुपर्ने बताएका छन्। उनीहरूले वाङचुकलाई पनि स्वास्थ्यलाई प्राथमिकतामा राख्दै भोक हड्ताल अन्त्य गर्न अपिल गरेका छन्। चिकित्सकीय विवरणअनुसार लामो समयदेखि केवल पानी र आवश्यक लवणको भरमा रहेका वाङचुकको तौल करिब ८ किलोग्रामभन्दा बढी घटिसकेको छ। रक्तचिनी (ब्लड सुगर) र रक्तचापमा गिरावट देखिएपछि चिकित्सकहरूको निगरानी अझ कडा बनाइएको छ। सोनम वाङचुकले भने आफ्ना माग पूरा नभएसम्म आन्दोलन जारी राख्ने अडान दोहोर्याएका छन्। आन्दोलनकारीहरूले परीक्षा प्रणालीमा देखिएको अनियमिततामाथि निष्पक्ष छानबिन, दोषीमाथि कारबाही तथा शिक्षा क्षेत्रमा जवाफदेहिताको माग गरिरहेका छन्। यस आन्दोलनले देशभरका युवामाझ व्यापक समर्थन पाउँदै गएको छ।