मन्टभियट रोडमा फोहोर-मैला थुप्रिने क्रम बढ़दैछ

खरसाङ, (निसं): खरसाङको मन्टभियट रोडस्थित क्याम्ब्रिज स्कूल मुनि केही समयदेखि फोहोर-मैला थुपारिने स्थान बनेको छ। यहाँ सड़क किनारको नालीमा फोहोर-मैलाको थुप्रो सधैँ रहने गरेको छ। कुनै समय फोहोर-मैला छरिएर सड़कमा यत्रतत्र फैलिएको अवस्थामा पनि देखिएको छ। छरिएको फोहोर-मैलामा कुहेको जिनिस रहने गरेकोले यो सड़कमा कुद्ने गरेका मोटर बाईक चिप्लिएको पनि देखिएको छ। स्थानीय मानिसहरूले यहाँ ल्याएर फोहोर-मैला थुपार्ने गरेको कतिपयले बताएका छन्‌‍ भने कतिपयले नगरपालिका कर्मचारीहरूले विभिन्न स्थानबाट संकलन गरेर ल्याएका फोहोर-मैला यहाँ राख्ने गरेको पनि बताएका छन्‌‍। यस स्थानमा फोहोर-मैला थुपारिएकोले छेउछाउका मानिसहरू समस्यामा परेका छन्‌‍। छेउछाउका कतिपय मानिसहरूले फोहोर-मैला सड़िएर दुर्गन्ध आउने गरेको पनि बताएका छन्‌‍ भने कतिपयले फोहोर-मैलाको कारण झिंगा घरमा भन्किने गरेको पनि बताएका छन्‌‍। स्मरण गराइन्छ, खरसाङ नगरपालिकाले फोहोर-मैला नगरवासीको घर-आँगनबाट उठाउने कार्य शुरु गरेपछि नगरपालिका क्षेत्रमा रहेका धेरै मैलादनीहरू बन्द गरिएका छन्‌‍ अथवा हटाइएका छन्‌‍। यसो हुँदा कतिपय नगरवासीले आफ्नो घर, दोकान वा होटलमा निस्किएको फोहोर-मैला बिहान नगरपालिका कर्मचारीहरूले उठाएर लाजाउन्‌‍ भनी कुनै स्थानमा राखिदिने गरेका छन्‌‍। यसरी राखिएको फोहोर-मैला नउठाइएको खण्डमा त्यस स्थानमा फोहोर-मैलाको थुप्रो लाग्ने गरेको पाइएको छ। आफ्नो घर, दोकान, होटलबाट निस्किएको फोहोर-मैला बिहान नगरपालिका कर्मचारीलाई दिन पर्ने नगरपालिकाको सुझाउ पनि छ। खरसाङ्को पार्क लोकेशनस्थित सुपर मार्केट नजिक पुरानो मैलादानी रहेको स्थानमा पटक पटक फोहोर-मैलाको डङ्गुर लाग्ने गरेको पाइएको छ भने केही समय यता मन्टिभियट रोडको यस स्थानमा पनि फोहोर-मैलाको थुप्रो लाग्ने गरेको पाइएको छ।