सामाजिक उत्तरदायित्वलाई आत्मसात गर्दै नासे एकता परिवारले “आफ्नो गाउँ आफैँ बनाऔँ” भन्ने मूल नाराका साथ फुटपात सरसफाइ अभियान सञ्चालन गरेको छ। वर्षायाममा पैदलयात्री, विशेषगरी विद्यालय जाने–आउने विद्यार्थीहरूलाई सहज आवतजावत गराउने उद्देश्यले आयोजित यस अभियानमा संगठनका धेरै सदस्यहरूको सक्रिय सहभागिता रहेको थियो।
अभियानका क्रममा फुटपातमा उम्रिएका झारपात हटाउनुका साथै फुटपातको दुवैतर्फ जमेको फोहोर र अवरोधहरू सफा गरिएको थियो। वर्षाको समयमा पानी जम्ने, चिप्लिने तथा पैदलयात्रीलाई हिँडडुलमा समस्या हुने अवस्थालाई मध्यनजर गर्दै सरसफाइ गरिएको संगठनले जनाएको छ।
नासे एकता परिवारका मूलसचिव अजय लाबरका अनुसार, संगठनले केवल सरसफाइमा मात्र सीमित नभई प्रत्येक महिनामा कम्तीमा एउटा सामाजिक सेवामूलक कार्यक्रम सञ्चालन गर्ने नीति लिएको छ। सोही कार्यक्रमअन्तर्गत यसपटक फुटपात सरसफाइ अभियान सञ्चालन गरिएको उनले बताए।
उनले भने, “वर्षायाममा विद्यार्थी, ज्येष्ठ नागरिक तथा गाउँलेहरूलाई सुरक्षित र सहज रूपमा हिँडडुल गर्न सकून् भन्ने उद्देश्यले यो अभियान सञ्चालन गरेका हौँ। समाजका लागि सकारात्मक योगदान पुर्याउने कार्यलाई आगामी दिनहरूमा पनि निरन्तरता दिनेछौँ।”
स्थानीयवासीहरूले पनि नासे एकता परिवारको यस पहलको प्रशंसा गर्दै यस्ता सामाजिक अभियानले समुदायमा सरसफाइप्रति सचेतना बढाउनुका साथै सामूहिक उत्तरदायित्वको भावना विकास गर्न महत्वपूर्ण भूमिका खेल्ने विश्वास व्यक्त गरेका छन्।
संगठनले आगामी दिनहरूमा पनि वातावरण संरक्षण, सरसफाइ, वृक्षारोपण तथा अन्य सामाजिक सेवासम्बन्धी कार्यक्रमहरू सञ्चालन गर्दै समुदायसँग सहकार्यलाई अझ सुदृढ बनाउने प्रतिबद्धता जनाएको छ।
