दुधेको बालासन खोलामा मङ्गलवार राती भएको घटनामा चारजनाको ज्यान बचाउने दुधे आँपेटार निवासी दिल कुमार सुब्बालाई स्थानीय डम्फेटार ग्राममा बुधवार सम्मान जनाइयो। तिनलाई यस प्रकारको साहसिक कार्यको निम्ति सम्मान जनाउँदै खदा माला लगाइयो। यसपछि सुब्बाले आफूले गरेको कार्यलाई सराहना गर्दै सम्मान जनाइएकोमा ग्रामवासीहरूलाई धन्यवाद दिए। तिनलाई मङ्गलवार भएको घटनाबारे जानकारी दिँदै तिनले डम्फेटारस्थित बालासन खोलामा एउटा गाडी अनि मानिसहरू बगाएको घटना थाहा पाएलगत्तै घटनास्थलमा पुगेर डोरी कम्मरमा बाँधेर खोलाभित्र पसेर पालैपालो चारजनालाई बाहिर निकाल्न सक्षम भएको जनाए। सुब्बाले यसअघि पनि यस्ता धेरै मानिसहरूलाई उद्धार गरिएको जनाउँदै यद्यपि यस्ता कार्यहरूमा सरकार अनि सम्बन्धित निकायले अझ सहयोग गरिदिए असल हुने बताए। तिनले विशेषगरी एनडीआरएफद्वारा आवश्यक प्रशिक्षण तथा उद्धार कार्यका सामग्रीहरू उपलब्ध गराइए मानिसहरूलाई उद्धार गर्न तथा ज्यान बचाउन धेरै सहयोग मिल्ने थियो भनी बताए।
