स्वास्थ्य कारण ओपनएआईकी दोस्रो पदकी कार्यकारी सिमो बाहिरिने

कृत्रिम बुद्धिमत्ता (एआई) कम्पनी ओपनएआईकी दोस्रो वरीयताकी कार्यकारी तथा एजीआई (Artificial General Intelligence) कार्यान्वयन प्रमुख फिड्जी सिमोले स्वास्थ्य समस्याका कारण आफ्नो पूर्णकालीन जिम्मेवारीबाट अलग हुने घोषणा गरेकी छन्। विगत तीन महिनादेखि चिकित्सकीय बिदामा रहेकी सिमोले स्वास्थ्य अवस्था अपेक्षाभन्दा जटिल बनेपछि अब पूर्ण रूपमा उपचारमा केन्द्रित हुनुपर्ने भएकाले अंशकालीन सल्लाहकारका रूपमा मात्र कम्पनीसँग आबद्ध रहने निर्णय गरेकी हुन्। सिमोले सामाजिक सञ्जालमार्फत सार्वजनिक गरेको वक्तव्यमा आफू सात वर्षदेखि दीर्घकालीन न्युरो–इम्युन सम्बन्धी रोगसँग संघर्षरत रहेको र पछिल्लो समय रोगको अवस्था गम्भीर बनेपछि लामो विश्राम आवश्यक भएको बताएकी छन्। उनले उपचार प्रक्रिया आफूले अनुमान गरेभन्दा लामो र जटिल हुने स्पष्ट भएपछि दैनिक कार्यकारी जिम्मेवारीबाट पछि हट्ने निर्णय गरेको उल्लेख गरेकी छन्।सन् २०२५ मा ओपनएआईमा आबद्ध भएकी सिमोले कम्पनीको उत्पादन विकास, व्यावसायिक रणनीति तथा एआई प्रविधिलाई विश्वव्यापी रूपमा प्रयोगकर्तामाझ पुर्‍याउने जिम्मेवारी सम्हाल्दै आएकी थिइन्। यसअघि उनी इन्स्टाकार्टकी प्रमुख कार्यकारी अधिकृत (CEO) तथा मेटा (फेसबुक) मा वरिष्ठ नेतृत्व भूमिकामा कार्यरत थिइन्। ओपनएआईमा उनी प्रमुख कार्यकारी अधिकृत स्याम अल्टम्यानपछि सबैभन्दा प्रभावशाली कार्यकारीमध्ये एक मानिन्थिन्। ओपनएआईले सिमोले सम्हाल्दै आएका जिम्मेवारीहरू अब कम्पनीका अध्यक्ष ग्रेग ब्रोकम्यान, प्रमुख वित्तीय अधिकृत सारा फ्रायर तथा प्रमुख रणनीति अधिकृत जेसन क्वोनलगायत वरिष्ठ नेतृत्व टोलीबीच बाँडफाँट गरिने जनाएको छ। कम्पनीले नेतृत्व परिवर्तनले नियमित कामकाजमा कुनै अवरोध नआउने विश्वास व्यक्त गरेको छ।ओपनएआईका प्रमुख कार्यकारी अधिकृत स्याम अल्टम्यानले सिमोको योगदानको उच्च प्रशंसा गर्दै उनको नेतृत्वले कम्पनीको व्यवसाय विस्तार, उत्पादन विकास र दीर्घकालीन रणनीतिमा महत्त्वपूर्ण भूमिका खेलेको बताएका छन्। उनले सिमोको शीघ्र स्वास्थ्यलाभको कामना गर्दै भविष्यमा सल्लाहकारका रूपमा उनको अनुभवबाट कम्पनीले लाभ लिइरहने विश्वास व्यक्त गरेका छन्। स्वास्थ्यका कारण भएको यो निर्णय ओपनएआईमा पछिल्ला महिनाहरूमा देखिएको नेतृत्व पुनर्संरचनाको अर्को महत्त्वपूर्ण घटनाका रूपमा हेरिएको छ। कम्पनी कृत्रिम बुद्धिमत्ता क्षेत्रमा प्रतिस्पर्धा तीव्र बन्दै गएको अवस्थामा नयाँ उत्पादन विकास, व्यवसाय विस्तार र दीर्घकालीन रणनीतिलाई अघि बढाइरहेको छ।