फिफा विश्वकप २०२६ः फ्रान्सले इराकलाई ३-० ले गरयो पराजित

फ्रान्सले खराब मौसमका कारण दुई घण्टाभन्दा बढी रोकिएको खेलमा इराकलाई ३–० ले पराजित गर्दै फिफा विश्वकप २०२६ को नकआउट चरणमा स्थान सुरक्षित गरेको छ। फिलाडेल्फियामा सम्पन्न समूह ‘आई’ को खेलमा कप्तान किलियन एमबाप्पेले आफ्नो १००औँ अन्तर्राष्ट्रिय खेललाई स्मरणीय बनाउँदै दुई गोल गरे भने ओस्मान डेम्बेलेले एक गोल थपे। पहिलो हाफमै एमबाप्पेको गोलमार्फत अग्रता लिएको फ्रान्सको खेल मध्यविरामपछि चट्याङ र भीषण वर्षाका कारण दुई घण्टाभन्दा बढी रोकिएको थियो। स्थानीय सुरक्षा प्रोटोकलअनुसार मौसम सामान्य भएपछि मात्र खेल पुनः सुरु गरिएको थियो। खेल पुनः सुरु भएपछि इराकले बराबरीको प्रयास गरे पनि रक्षात्मक कमजोरी महँगो सावित भयो। इराकी डिफेन्सको गल्तीको फाइदा उठाउँदै एमबाप्पेले व्यक्तिगत दोस्रो गोल गरे भने डेम्बेलेले अर्को गोल थप्दै फ्रान्सको सहज जित सुनिश्चित गरे। यससँगै फ्रान्सले लगातार दोस्रो जित हासिल गर्दै अन्तिम ३२ मा स्थान पक्का गरेको छ। एमबाप्पेले प्रतियोगितामा चार गोल पुर्‍याउँदै आफ्नो विश्वकप गोल संख्या १६ पुर्‍याएका छन्, जसले उनलाई जर्मनीका मिरोस्लाभ क्लोजेसँग बराबरीमा पुर्‍याएको छ। अब फ्रान्सले समूह विजेताको टुंगो लगाउने खेलमा नर्वेसँग प्रतिस्पर्धा गर्नेछ भने इराकले प्रतियोगितामा टिकिरहन सेनेगलविरुद्ध जित निकाल्नुपर्ने दबाबमा रहनेछ।