१५ वर्षीय वैभव सूर्यवंशीले रचे इतिहास,

१५ वर्षीय वैभव सूर्यवंशीले रचे इतिहास, सचिन तेन्दुलकरको ३६ वर्ष पुरानो कीर्तिमान तोड्दै भारतका सबैभन्दा कम उमेरका अन्तर्राष्ट्रिय क्रिकेटर बने। भारतका युवा ब्याटर वैभव सूर्यवंशीले अन्तर्राष्ट्रिय क्रिकेटमा डेब्यु गर्दै ऐतिहासिक उपलब्धि हासिल गरेका छन्। इंग्ल्यान्डविरुद्धको दोस्रो ट्वान्टी–२० अन्तर्राष्ट्रिय खेलमा मैदान उत्रिएका १५ वर्षीय सूर्यवंशी भारतका लागि सबैभन्दा कम उमेरमा अन्तर्राष्ट्रिय क्रिकेट खेल्ने खेलाडी बनेका छन्। उनले भारतीय क्रिकेटका महान् ब्याटर सचिन तेन्दुलकरको ३६ वर्ष पुरानो कीर्तिमान तोडेका हुन्। वैभवले १५ वर्ष ९९ दिनको उमेरमा भारतबाट अन्तर्राष्ट्रिय क्रिकेटमा डेब्यु गरेका हुन्। यसअघि सचिन तेन्दुलकरले सन् १९८९ मा पाकिस्तानविरुद्ध १६ वर्ष २०५ दिनको उमेरमा अन्तर्राष्ट्रिय क्रिकेटमा डेब्यु गर्दै भारतका सबैभन्दा कम उमेरका खेलाडी बन्ने कीर्तिमान बनाएका थिए। उक्त कीर्तिमान तीन दशकभन्दा बढी समयसम्म कायम रहेको थियो। बिहारका सूर्यवंशी पछिल्ला केही वर्षयता भारतीय क्रिकेटका सबैभन्दा प्रतिभाशाली युवा खेलाडीमध्ये एकका रूपमा परिचित छन्। उनले उमेर समूहको क्रिकेट, घरेलु प्रतियोगिता तथा इन्डियन प्रिमियर लिग (आईपीएल) मा उत्कृष्ट प्रदर्शन गर्दै राष्ट्रिय टोलीमा स्थान बनाउन सफल भएका हुन्। विशेषगरी आईपीएलमा उनको आक्रामक ब्याटिङ शैलीले क्रिकेट विश्लेषक र पूर्वखेलाडीहरूको ध्यान खिचेको थियो।इंग्ल्यान्डविरुद्धको डेब्यु खेलमा सूर्यवंशीले आत्मविश्वासपूर्ण सुरुआत गर्दै १० बलमा १४ रन बनाए। उनले आफ्नो इनिङ्समा दुई आकर्षक छक्का प्रहार गर्दै अन्तर्राष्ट्रिय स्तरमा पनि निर्भीक शैलीमा ब्याटिङ गर्न सक्ने संकेत दिएका थिए। यद्यपि, ठूलो इनिङ्स खेल्न भने सफल भएनन्। भारतले उक्त खेलमा कडा प्रतिस्पर्धा गरे पनि इंग्ल्यान्डसँग चार विकेटले पराजय बेहोर्नुपरेको थियो। तर पराजयका बीच वैभव सूर्यवंशीको ऐतिहासिक डेब्यु भारतीय क्रिकेटका लागि सकारात्मक पक्षका रूपमा हेरिएको छ। क्रिकेट विज्ञहरूले सूर्यवंशीलाई भारतको भावी स्टारका रूपमा चित्रण गर्दै उनको डेब्युले भारतीय क्रिकेटमा नयाँ पुस्ताको आगमनको संकेत गरेको बताएका छन्। कम उमेरमै राष्ट्रिय टोलीमा स्थान बनाउन सफल भएका सूर्यवंशीमाथि आगामी दिनमा अझ उत्कृष्ट प्रदर्शन गर्ने अपेक्षा गरिएको छ।