सिलगढ़ी, दिसम्बर (निसं): बिरामीको मृत्युको कारण फेरि उत्तर बंगाल मेडिकल कलेज अस्पतालमाथि चिकित्सा लापरवाहीको आरोप लागेको छ। यस घटनालाई केन्द्र गरेर बिहीबार मध्यरातमा अस्पतालको आपतकालीन विभागमा ड्युटीमा रहेका चिकित्सक अर्स अनि मृतकको परिवारहरूबीच हातापाई भएको घटना प्रकाशमा आएको छ। यसका कारण मृतकको परिवारकी एक महिला र शवलाई बिहीबार दिउँसो १२ बजीसम्म राखेको आरोप अस्पतालको आपतकालीन विभागमा ड्युटीमा रहेका डाक्टर र नर्सहरूमाथि लागेको छ। पुलिसको हस्तक्षेपमा महिलालाई उनका परिवारका सदस्यहरूले दिउँसो १२ बजीपछि रिहा गराए अनि उनीहरू शव लिएर घरतिर लागे।
अस्पताल स्रोतका अनुसार, बाघडुग्राको भुजियापानीकी २७ वर्षीया पूजा सहानीलाई पेट दुख्ने समस्या भएको अवस्थामा अस्पताल ल्याइएको थियो। उनलाई तुरुन्तै भर्ना गरिएको थियो। मृतकको परिवारले सर्जिकल वार्डमा पनि कुनै उपचार नगरिएको आरोप लगाएको छ। पीड़ितको परिवारको तर्फबाट मोनोतोष सहानीले भने, आपतकालीन विभागका डाक्टरहरूले बिरामीलाई नहेरी भर्नाको निम्ति पठाइदिए। यस बारे भन्न जाँदा उनीहरूले हामीसँग दुर्व्यवहार गरे।
वार्डका जुनियर डाक्टरहरूले पनि कुनै चिकित्सा गरेनन्। यहाँ सबैजना आफ्नो मोबाइल फोनमा व्यस्त थिए। केही क्षणमै हाम्रो बिरामीको मृत्यु भयो। चिकित्सा लापरवाहीको कुरा भन्न जाँदा अस्पतालका चिकित्सक अनि नर्सहरू हामीमाथि खनिन आए।
त्यतिबेला दुई पक्षबीच धक्काधकी भयो। त्यसपछि पुष्पा सहानी नामकी मेरी एक बहिनीलाई ड्युटीमा रहेका चिकित्सक र नर्सहरूले हिरासतमा लिए। उनीहरूले शव पनि छोडेनन्।यसलाई लिएर दिउँसोसम्म तनाव रहेको थियो। मृतकको परिवारले थानामा लिखित आरोप दर्ता गरेका थिए। पुलिसले जनाएअनुसार, बिहीबार दिउँसो २ बजीसम्म अस्पतालको पक्षबाट कुनै लिखित आरोप गरिएको थिएन। यसलाई लिएर प्रश्न उठेको छ।
मृतकको परिवारबाट लिखित आरोप पाएपछि हामीले शव लैजाने पहल गर्यो भनी मेडिकल आउटपोस्टका पुलिसले जानकारी गराउँदै अझ भन्यो, यसका साथै हिरासतमा राखिएको महिलालाई रिहा गर्ने व्यवस्था गरिएको थियो। यस घटनामा आपतकालीन विभागमा ड्युटीमा रहेका चिकित्सकहरूको भूमिकामाथि प्रश्न उठेको छ। आपतकालीन विभागका चिकित्सकहरूले बिरामीहरूलाई राम्रोसँग चिकित्सा सेवा नपुऱ्याएको दीर्घ दिनदेखिको आरोप छ। धेरैजना आफ्नो मोबाइल फोनमा व्यस्त हुन्छन्। कोही विरोध गर्न जाँदा उनीहरूमाथि दुर्व्यवहार गरिन्छ।तर, अस्पतालका सुपर एवं प्रिन्सिपल डा. सञ्जय मल्लिक यी सबै आरोपहरू स्वीकार गर्न चाहँदैनन् । उनले भने, उक्त युवतीलाई रेफर गरिएको थियो। उनको प्यान्क्रियाटाइटिस जटिल भएको थियो। उनलाई सर्जिकल वार्डमा भर्ना गरिएको थियो।
अल्ट्रासोनोग्राफीले उनलाई एक्युट प्यान्क्रियाटाइटिस भएको देखाएको थियो। तुरुन्तै, परिवारका सदस्यहरूलाई उनीहरूको बिरामी गम्भीर अवस्थामा रहेको जानकारी दिइएको थियो। उनलाई बचाउन गाह्रो भयो। यसपछि, जब उनको मृत्यु भयो, मृतकका परिवारका सदस्यहरूले मृत्युको बारेमा परिवारलाई जानकारी दिएकोमा डाक्टरलाई थप्पड हाने। यसले हंगामा मच्चायो। पुलिसलाई खबर गरियो। पुलिस घटनास्थलमा पुगेर सबै कुरा नियन्त्रणमा ल्यायो। यद्यपि, शव र मृतकका परिवारका सदस्यहरू कसैलाई पनि अस्पतालमा हिरासतमा राखिएको थिएन।
