कालेबुङ जिल्लाको पेदोङ अवस्थित सेन्ट जर्ज हायर सेकेन्डेरी स्कूलमा शनिबार सम्बर्द्धना र धन्यवाद ज्ञापन आयोजना गरिएको थियो। हेड मास्टर्स एसोसिएशन, कालेबुङ जिल्लाद्वारा आयोजित कार्यक्रमको अध्यक्षता हेड मास्टर्स एसोसिएशनका प्रमुख विजय प्रधानले गरेका थिए भने प्रमुख अतिथिका रुपमा कालेबुङका विधायक रुडेन सादा लेप्चा उपस्थित थिए अनि विशिष्ट अतिथि जीटीएको हायर सेकेन्डेरी एजुकेशन डिपार्टमेन्टका सभासद सञ्चबीर सुब्बा र सेन्ट जर्ज हायर सेकेन्डेरी स्कूलका प्रिन्सिपल फादर चाल्स सादा उपस्थित थिए। यसरी नै प्राइमेरी एजुकेशन बोर्डका प्रमुख सामडुप लामा, सभादहरू क्रमश: सीबी गुरूङ, हेमन्त राई, लाक्पा नामगे भुटिया, पौल सिमिक, कमल सुब्बा कार्यक्रममा वर्ष 2024-25 मा दशौं र बाह्रौंको परीक्षामा सर्वोच्च अङ्क ल्याउने जीटीएभरिका विद्यार्थीहरूलाई सम्बर्द्धना जनाइयो। यसका साथै विद्यार्थीहरूको उज्ज्वल भविष्यका लागि निरन्तर परिश्रम गर्ने प्रत्येक शिक्षण संस्थाका प्रमुखहरू लगायत अन्य शिक्षकगणलाई पनि सम्बर्द्धना जनाइयो। कार्यक्रमको गरिमा बढाउन सांस्कृतिक प्रस्तुति पनि सामेल गरिएको थियो। कार्यक्रमको सञ्चालन हेड मास्टर्स एसोसिएशनका सचिव सागर शर्मा अनि रबिन सेवाले गरेको चन्द्रकला राईले जानकारी दिएकी छिन्।