राजनैतिक विभाजनभन्दा माथि उठेर साझा भावनाका साथ अघि बढ्न भाजपा दार्जीलिङ जिल्ला अध्यक्ष सञ्जीव लामाको आह्वान
भारतीय जनता पार्टी (भाजपा) दार्जीलिङ जिल्ला अध्यक्ष सञ्जीव लामाले गोर्खाल्याण्डको मुद्दामा केन्द्र सरकारले संवैधानिक समाधानतर्फ कार्य गरिरहेको स्पष्ट पारेका छन्। राजनैतिक विभाजनभन्दा माथि उठेर गोर्खा समाज एकजुट हुनुपर्नेमा जोड दिँदै उनले पहाडमा पुरानो विभाजनकारी राजनीतिको अन्त्य हुनुपर्ने बताएका छन्। गोरुबथान भ्रमणका क्रममा पत्रकारहरूसँग कुरा गर्दै उनले यस साझा भावनालाई शान्तिपूर्ण रूपमा अघि बढाउन सबै पक्षसँग आग्रह गरेका छन्।
यो विषय सम्पूर्ण गोर्खा समुदायको पहिचान, अधिकार र भविष्यसँग जोडिएको दीर्घकालीन माग भएकाले अत्यन्तै महत्वपूर्ण छ। पहाडको राजनीतिमा लामो समयदेखि चल्दै आएको हिंसा, प्रतिशोध र विभाजनको संस्कृतिको अन्त्य गरी नयाँ, शिक्षित र दूरदर्शी नेतृत्व निर्माणको बहस यसले सुरु गरेको छ। केन्द्र सरकार र संवैधानिक पदमा रहेका व्यक्तित्वहरूबाट सकारात्मक संकेत आइरहेको अवस्थामा, गोर्खा समाजको आन्तरिक एकता र राजनीतिक स्थायित्वका लागि यो आह्वानले विशेष अर्थ राख्दछ।
मुख्य समाचार
भारतीय जनता पार्टी (भाजपा) दार्जीलिङ जिल्ला अध्यक्ष सञ्जीव लामाले गोर्खाल्याण्डको मुद्दामा भाजपा सरकारले संवैधानिक समाधानतर्फ कार्य गरिरहेको ठोकुवा गरेका छन्। उनले अब गोर्खा समाजलाई राजनैतिक विभाजनभन्दा माथि उठेर एकजुट हुने समय आएको बताएका छन्। शुक्रवार गोरुबथान भ्रमणमा आएका अध्यक्ष लामाले शनिवार बिहान स्थानीय पत्रकारहरूसँग कुराकानी गर्दै पश्चिम बंगाल विधानसभामा राज्यपालले गोर्खा समुदायको दीर्घकालीन मागलाई सम्बोधन गरिसकेपछि त्यस विषयमा बारम्बार बैठक र अनावश्यक विवादको आवश्यकता नरहेको स्पष्ट पारे।
तिनले अहिलेको केन्द्र सरकारलाई संघर्ष र आन्दोलनबाट आएको तथा गोर्खा समुदायको पीडा बुझेको सरकारको संज्ञा दिए। लामाले भने, “जब संवैधानिक पदमा रहेका राज्यपालले नै गोर्खाल्याण्डको दीर्घकालीन मागमा सरकार काम गरिरहेको स्पष्ट पारिसक्नुभएको छ भने त्यसलाई सम्मान गर्नुपर्छ। गृहमन्त्रीले पनि दीर्घकालीन व्यवस्थाभन्दा समाधानतर्फ अघि बढिरहेको कुरा सार्वजनिक गरिसक्नुभएको छ।”
अध्यक्ष लामाले गोर्खाल्याण्डको विषय कुनै पार्टी विशेषको नभई सम्पूर्ण गोर्खा समुदायको साझा भावना भएको उल्लेख गर्दै सबै राजनैतिक पार्टी, धर्म र समुदायका गोर्खाहरूलाई एउटै सूत्रमा बाँधेर शान्तिपूर्ण वातावरणमा समाधानको प्रक्रियालाई सहयोग गर्नुपर्ने धारणा राखे। तिनले जनताको हितभन्दा व्यक्तिगत वा पार्टीगत स्वार्थलाई प्राथमिकता दिने राजनीति स्वीकार्य हुन नसक्ने बताए। आफू कुनै व्यक्तिको नेता नभई पार्टीले दिएको जिम्मेवारी निर्वाह गरिरहेको कार्यकर्ता मात्र भएको बताउँदै उनले भाजपा लोकतान्त्रिक मूल्य र संगठनात्मक निर्णय प्रक्रियामा विश्वास गर्ने पार्टी भएको उल्लेख गरे। सामूहिक छलफल र लोकतान्त्रिक प्रक्रियाबाट नै पार्टीमा निर्णय हुने उनको भनाइ थियो।
गोर्खाल्याण्ड आन्दोलनमा आफ्नो पनि सक्रिय सहभागिता रहेको स्मरण गर्दै लामाले आन्दोलनका क्रममा हजारौं युवाले जेल जीवन बिताएको, धेरैले ज्यान गुमाएको तथा थुप्रै परिवारले अपूरणीय क्षति बेहोरेको बताए। आन्दोलनमा सहभागी हुनु आफ्नो कर्तव्य भएको भन्दै त्यसलाई व्यक्तिगत उपलब्धि वा राजनैतिक लाभका रूपमा प्रस्तुत गर्न नहुने तिनको तर्क थियो। वास्तविक सम्मान त आन्दोलनका शहीदहरू र त्याग गर्ने जनताको हुनुपर्नेमा उनले जोड दिए।
पहाडको राजनीतिमा दीर्घकालदेखि चल्दै आएको हिंसा, प्रतिशोध, विभाजन र जिन्दाबाद-मुर्दाबादको संस्कृतिको अन्त्य हुनुपर्ने लामाले बताए। विगतमा सत्ता परिवर्तनसँगै विकास निर्माण रोकिने प्रवृत्तिका कारण पहाडको समग्र विकास प्रभावित भएको टिप्पणी गर्दै उनले पहाड शून्यबाट सुरु भएर दशसम्म पुग्ने र फेरि शून्यमा फर्किने चक्रमा फसेको बताए। अब राष्ट्रलाई नेतृत्व गर्न सक्ने नयाँ पुस्ताको शिक्षित, सक्षम र दूरदर्शी युवा नेतृत्व तयार गर्नुपर्ने उनको धारणा छ।
गोरूबथान पञ्चायत समितिको नेतृत्वबारे बोल्दै लामाले लामो समयदेखि रहेको आन्तरिक विवाद अन्त्य भएको जानकारी गराए। सहमतिमा हेमा राईलाई नयाँ सभापति चयन गरिएको छ भने सहकारी सभापति सोनाम भूटियालाई यथावत् राखिएको छ। आगामी दुई वर्ष पञ्चायत समितिले राजनैतिक खिचातानीभन्दा माथि उठेर जनताको हित र दुर्गम क्षेत्रको विकासमा केन्द्रित भएर काम गर्नुपर्नेमा उनले जोड दिए।
गोर्खा जनमुक्ति मोर्चासँग देखिएको विवादबारे सोधिएको प्रश्नमा लामाले आफ्नो असहमति कुनै व्यक्ति विशेषसँग नभई कार्यशैली र नीतिसँग रहेको स्पष्ट पारे। मोर्चाले समय-समयमा गोर्खाल्याण्ड, जीटीए, छैटौँ अनुसूची र अन्य विकल्पबारे फरकफरक धारणा सार्वजनिक गर्दै आएको आरोप लगाउँदै राजनैतिक नेतृत्वले परिस्थिति अनुसार बारम्बार धारणा परिवर्तन गर्दा जनतामा अन्योल सिर्जना हुने उनले बताए। गोर्खाल्याण्डको संवैधानिक समाधान नै आन्दोलनकारीहरूको वास्तविक सम्मान हुने उल्लेख गर्दै उनले पहाडमा भाजपाप्रतिको जनसमर्थन बढिरहेको दाबी गरे।
FAQs
१. गोर्खाल्याण्ड मुद्दामा भाजपा दार्जीलिङ जिल्ला अध्यक्ष सञ्जीव लामाको मुख्य भनाइ के हो?
अध्यक्ष सञ्जीव लामाका अनुसार गोर्खाल्याण्डको मुद्दामा केन्द्र सरकारले संवैधानिक समाधानतर्फ कार्य गरिरहेको छ। अब गोर्खा समाजले राजनैतिक विभाजनभन्दा माथि उठेर साझा भावनाका साथ एकजुट भई शान्तिपूर्ण वातावरणमा समाधानको प्रक्रियालाई सहयोग गर्नुपर्छ।
२. पहाडको राजनीतिक नेतृत्वका सम्बन्धमा लामाले कस्तो विचार व्यक्त गरेका छन्?
लामाले पहाडमा लामो समयदेखि चल्दै आएको हिंसा, प्रतिशोध र विभाजनको राजनीतिक संस्कृतिको अन्त्य हुनुपर्ने बताएका छन्। पहाडलाई पुरानै राजनीतिक चक्रबाट मुक्त गर्न राष्ट्रलाई नेतृत्व गर्न सक्ने शिक्षित, सक्षम र दूरदर्शी नयाँ पुस्ताको नेतृत्व तयार गर्नुपर्ने उनको भनाइ छ।
३. गोरूबथान पञ्चायत समितिको आन्तरिक विवाद कसरी समाधान गरियो?
गोरूबथान पञ्चायत समितिभित्र लामो समयदेखि रहेको आन्तरिक विवाद पार्टीका सबै पक्षसँगको सामूहिक छलफल र सहमतिपछि अन्त्य भएको छ। सहमति अनुसार हेमा राईलाई नयाँ सभापति चयन गरिएको छ भने सहकारी सभापति सोनाम भूटियालाई यथावत् राखिएको छ।
