बुन्डिबुग्यो इबोला भाइरसविरुद्ध दुई उपचार विधिको क्लिनिकल परीक्षण शुरू

कङ्गो लोकतान्त्रिक गणतन्त्र (डीआरसी) मा फैलिएको बुन्डिबुग्यो प्रजातिको इबोला भाइरसविरुद्ध सम्भावित दुई उपचार विधिको क्लिनिकल परीक्षण औपचारिक रूपमा सुरु गरिएको छ। विश्व स्वास्थ्य संगठन (डब्लुएचओ) को प्रायोजनमा सञ्चालन गरिएको उक्त परीक्षणमा पहिलो बिरामीलाई भर्ना गरिसकिएको छ। डीआरसी, बेल्जियम र बेलायतका अनुसन्धानकर्ताहरूको सहभागिता रहेको यस अध्ययनमा एक हजारभन्दा बढी बिरामीलाई समेट्ने लक्ष्य राखिएको छ। परीक्षणबाट बुन्डिबुग्यो प्रजातिको इबोलाविरुद्ध सबैभन्दा प्रभावकारी उपचार पत्ता लगाउने अपेक्षा गरिएको छ। मे महिनादेखि सुरु भएको वर्तमान प्रकोप केही समयसम्म पत्ता नलाग्दा डीआरसीमा हालसम्म एक हजार ४०० भन्दा बढी सङ्क्रमण पुष्टि भइसकेका छन् भने करिब ४४० जनाको मृत्यु भएको छ। छिमेकी युगान्डामा पनि २० जना सङ्क्रमित फेला परेका छन् भने दुई जनाको मृत्यु भएको छ। डब्लुएचओका अनुसार परीक्षण क्षमतामा उल्लेखनीय सुधार हुँदै १० वटा प्रयोगशालाबाट नमुना परीक्षण भइरहेको छ। त्यस्तै, सम्पर्कमा आएका पाँचमध्ये चार जनासम्म सम्पर्क पहिचान टोली पुग्न सफल भएको र उपचारका लागि ६५० शय्याको व्यवस्था गरिएको छ। यद्यपि स्वास्थ्य अधिकारीहरूले अविश्वास, हिंसा तथा सुरक्षासम्बन्धी चुनौती अझै गम्भीर रहेको बताएका छन्। केही उपचार केन्द्रमा आगजनी गरिनुका साथै बिरामीहरू उपचार केन्द्रबाट भागेका घटनाले संक्रमण नियन्त्रण प्रयासमा ठूलो बाधा पुगेको डब्लुएचओले जनाएको छ। यस्ता गतिविधिले संक्रमितको ज्यान जोखिममा पार्नुका साथै इबोला नियन्त्रण अभियानलाई थप जटिल बनाएको भन्दै स्वास्थ्य अधिकारीहरूले स्थानीय समुदायको सहयोग र विश्वास अपरिहार्य रहेको बताएका छन्।