फिफा विश्वकप २०२६: जोनाथन डेभिडको ह्याट्रिकमा क्यानडाको गोल वर्षा, कतारमाथि ६–० को ऐतिहासिक जित हासिल गरेको छ। सह–आयोजक क्यानडाले फिफा विश्वकप २०२६ अन्तर्गत समूह ‘बी’ को आफ्नो दोस्रो खेलमा कतारलाई ६–० को फराकिलो अन्तरले पराजित गर्दै विश्वकप इतिहासकै पहिलो जित दर्ता गरेको छ। बीसी प्लेस स्टेडियममा सम्पन्न खेलमा स्टार फरवार्ड जोनाथन डेभिडले ह्याट्रिक पूरा गर्दै टोलीको शानदार जितमा प्रमुख भूमिका निर्वाह गरे। खेलको सुरुआतदेखि नै क्यानडाले आक्रामक शैली अपनाएको थियो। घरेलु समर्थकहरूको उत्साहजनक समर्थनबीच खेलिरहेको टोलीले बल नियन्त्रण र आक्रमण दुवै क्षेत्रमा स्पष्ट प्रभुत्व जमायो। खेलको १६औँ मिनेटमा साइल लारिनले गोल गर्दै क्यानडालाई अग्रता दिलाए। त्यसपछि जोनाथन डेभिडले लगातार दुई गोल थप्दै पहिलो हाफ सकिँदा क्यानडालाई ३–० को बलियो अवस्थामा पुर्याए। कतारका लागि स्थिति झन् कठिन बन्यो जब पहिलो हाफमै होमाम अल अमिन रातो कार्ड खाँदै मैदानबाट बाहिरिए। १० खेलाडीमा सीमित भएको कतारमाथि क्यानडाले थप दबाब सिर्जना गरिरह्यो। दोस्रो हाफमा खेलले नाटकीय मोड लियो जब क्यानडाका मिडफिल्डर इस्माएल कोने गम्भीर चोटका कारण मैदानमै ढले। कतारी खेलाडी असिम मादिबोको खतरनाक ट्याकलपछि कोनेलाई स्ट्रेचरमार्फत अस्पताल लगिएको थियो। VAR समीक्षा पछि मादिबोलाई पनि रातो कार्ड देखाइयो र कतार नौ खेलाडीमा झर्यो।
सहकर्मीको चोटले भावुक बनेका क्यानडाली खेलाडीहरूले त्यसपछि खेललाई पूर्ण रूपमा आफ्नो नियन्त्रणमा लिए। कोनेको स्थानमा मैदान प्रवेश गरेका नाथन सालिबाले आकर्षक फ्रिकिकमार्फत गोल गरे र गोलपछि कोनेको जर्सी प्रदर्शन गर्दै सम्मान व्यक्त गरे। त्यसपछि कतारका मोहम्मद अल मन्नाईको आत्मघाती गोलले अन्तर ५–० बन्यो। इन्जुरी समयमा जोनाथन डेभिडले आफ्नो तेस्रो गोल गर्दै ह्याट्रिक पूरा गरे र क्यानडाको ६–० को ऐतिहासिक जित सुनिश्चित गरे। यद्यपि विशाल जितले क्यानडाली समर्थकहरूलाई उत्साहित बनाएको छ, इस्माएल कोनेको गम्भीर चोटले टोलीको खुसीमा तितोपन थपेको छ। प्रशिक्षक जेसी मार्शले खेलपछि कोनेको चोट टोलीका लागि ठूलो धक्का भएको बताएका छन्। प्रारम्भिक रिपोर्टअनुसार उनको खुट्टा भाँचिएको आशंका गरिएको छ। यस जितसँगै क्यानडा चार अंकसहित समूह ‘बी’ को शीर्ष स्थानमा उक्लिएको छ र नकआउट चरण पुग्ने सम्भावना बलियो बनाएको छ। कतार भने लगातार निराशाजनक प्रदर्शनपछि प्रतियोगिताबाट बाहिरिने संघारमा पुगेको छ।
