सामाजिक सञ्जाल कम्पनी मेटाले आफ्नो एआई-सक्षम स्मार्ट चस्मामा देखिएको गोपनीयतासम्बन्धी कमजोरी समाधान गर्न नयाँ सुरक्षा अपडेट सार्वजनिक गरेको छ। प्रयोगकर्ताले चस्माको रेकर्डिङ सूचक (एलईडी) बत्ती छोपेर वा बिगारेर लुकिछिपी भिडियो खिच्न सक्ने जोखिम सार्वजनिक भएपछि कम्पनीले यस्तो कदम चालेको हो।
नयाँ अपडेटअनुसार दोस्रो पुस्ताका मेटा स्मार्ट चस्माले रेकर्डिङ भइरहेको संकेत दिने एलईडी बत्ती ढाकिएको, हटाइएको वा बिगारिएको पत्ता लगाएमा क्यामेरा स्वतः निष्क्रिय हुनेछ। यसरी गोप्य रूपमा फोटो वा भिडियो खिच्ने प्रयासलाई रोक्न सकिने कम्पनीको भनाइ छ। साथै, मेटाले एलईडी प्रणालीमा छेडछाड गर्ने सेवा तथा सामग्रीमाथि पनि कडाइ गर्ने जनाएको छ।
यो निर्णय मेटाले भविष्यमा विकास गरिरहेको ‘अलवेज–अन’ (सधैं सक्रिय) एआई स्मार्ट चस्मासम्बन्धी समाचार सार्वजनिक भएपछि आएको हो। उक्त प्रविधिले प्रयोगकर्ताको वरपरको वातावरणलाई निरन्तर अवलोकन गरी आवश्यक पर्दा एआईमार्फत जानकारी उपलब्ध गराउने लक्ष्य राखेको बताइएको छ। तर यसले व्यक्तिको गोपनीयता, निगरानी तथा सहमतिबिनै रेकर्डिङ हुन सक्ने जोखिमबारे व्यापक बहस सुरु भएको छ।
गोपनीयता अधिकारकर्मीहरूले स्मार्ट चस्मा सामान्य चस्माजस्तै देखिने भएकाले वरपरका मानिसले आफू रेकर्ड भइरहेको थाहा नपाउने जोखिम अझै कायम रहेको बताएका छन्। एलईडी बत्ती जस्ता सुरक्षा उपाय पर्याप्त नभएको र एआईयुक्त वेयरेबल उपकरणका लागि थप कडा कानुनी तथा प्राविधिक मापदण्ड आवश्यक रहेको उनीहरूको तर्क छ।
मेटाले भने स्मार्ट चस्माको विकासमा गोपनीयतालाई प्राथमिकतामा राखिएको दाबी गरेको छ। कम्पनीका अनुसार नयाँ सफ्टवेयर अपडेटले अनधिकृत र गोप्य रेकर्डिङलाई रोक्ने सुरक्षा थप मजबुत बनाएको छ र भविष्यमा पनि प्रयोगकर्ता तथा सर्वसाधारणको गोपनीयता सुनिश्चित गर्न आवश्यक सुधारहरू जारी रहनेछन्।
