लामो समयको गर्मीले मिर्गौलामा गम्भीर असर पार्न सक्छ, चिकित्सकको चेतावनी

लामो समयसम्मको अत्यधिक गर्मी र शरीरमा पानीको कमी (डिहाइड्रेसन) ले मिर्गौलामा गम्भीर असर पार्न सक्ने भन्दै चिकित्सकहरूले सचेत रहन आग्रह गरेका छन्। अध्ययनहरूले गर्मीको लहर (हिटवेभ) का बेला मिर्गौलासम्बन्धी समस्या लिएर अस्पताल पुग्ने बिरामीको संख्या उल्लेख्य रूपमा बढ्ने देखाएका छन्। नेफ्रोलोजिस्ट डा. उदित गुप्ताका अनुसार शरीरमा पानीको कमी हुँदा मिर्गौलामा पुग्ने रक्तप्रवाह घट्छ, जसले शरीरका फोहोर पदार्थ फिल्टर गर्ने क्षमतामा असर पुर्‍याउँछ। लगातार डिहाइड्रेसन भएमा मिर्गौलामा अत्यधिक दबाब पर्नुका साथै गम्भीर अवस्थामा ‘एक्युट किड्नी इन्जुरी’ (Acute Kidney Injury) समेत हुन सक्छ। गर्मीका कारण अत्यधिक पसिना बग्दा पिसाब गाढा हुने भएकाले क्याल्सियम, अक्सालेट र युरिक एसिडजस्ता खनिजहरू जमेर मिर्गौलामा ढुंगा बन्ने जोखिम पनि बढ्छ। साथै, शरीरमा पानीको कमीले मूत्रनलीको संक्रमण (यूटीआई) हुने सम्भावना समेत बढ्ने चिकित्सकहरूको भनाइ छ। मिर्गौलामा समस्या देखिनुअघि अत्यधिक तिर्खा लाग्ने, पिसाब कम वा गाढा हुने, चक्कर लाग्ने, अत्यधिक थकान, टाउको दुख्ने, मांसपेशी बाउँडिने, वाकवाकी लाग्ने, शरीर कमजोर हुने तथा खुट्टा सुन्निने जस्ता लक्षण देखिन सक्छन्। यदि पिसाब एकाएक कम हुने, ढाड वा कम्मरमा तीव्र दुखाइ हुने वा पिसाबमा रगत देखिने समस्या भए तुरुन्त चिकित्सकको परामर्श लिन विज्ञहरूले सुझाव दिएका छन्। विशेषगरी ज्येष्ठ नागरिक, बाहिर काम गर्ने श्रमिक, खेलाडी, मधुमेह, उच्च रक्तचाप, दीर्घकालीन मिर्गौला रोग वा मिर्गौलामा ढुंगाको इतिहास भएका व्यक्तिहरू बढी जोखिममा रहने जनाइएको छ। चिकित्सकहरूले तिर्खा लाग्नुअघि नै नियमित पानी पिउने, पानीयुक्त फलफूल तथा तरकारी खाने, अत्यधिक नुन, चिनी र मदिराबाट टाढा रहने तथा दिउँसोको चर्को घाममा लामो समय नबस्न सल्लाह दिएका छन्।