दार्जीलिङ,21 मार्च(निसं): दार्जीलिङको सन्त जोसेफ कलेजको मास कम्युनिकेशन तथा पत्रकारिता विभागका लागि एक गर्विलो र ऐतिहासिक क्षण बनेकोछ। विभागका पूर्व विद्यार्थीहरूले सिक्किम अन्तर्राष्ट्रिय फिल्म फेस्टिभल-2026- मा पहिलो र दोस्रो स्थान हासिल गर्दै कलेजको प्रतिष्ठा बडाएकोछ भनी दार्जीलिङ सन्त जोसेफ कलेज सूत्रले बताएकोछ।
जानकारी अनुसार, पहिलो स्थान सुजन लाम्जेल र डेन् शेर्पाको टोलीले आफ्नो फिल्म डोकोको छाहारी- मार्फत हासिल गरेको हो, जसमा निहाल भण्डारीले डाइरेक्टर अफ फोटोग्राफीको भूमिका निर्वाह गरेका थिए। उनीहरूको फिल्मले उत्कृष्ट दृश्य कथन र प्राविधिक दक्षताका कारण विशेष स्थान बनाउँदै युवा फिल्म निर्माता र उनीहरूको मातृ संस्थाका लागि महत्वपूर्ण उपलब्धि हासिल गरेकोछ।
यसैगरी, दोस्रो स्थान अनन्तदीप रासाइलीले आफ्नो फिल्म सेतोघरी- मार्फत प्राप्त गरेका छन्। उल्लेखनीय कुरा के हो भने, यो फिल्म उनले विभागमा अध्ययनरत हुँदा आफ्नो ग्रेजुएशन प्रोजेक्ट-का रूपमा तयार पारेको थियो, जसले कलेजले प्रदान गरेको शैक्षिक तथा सिर्जनात्मक आधारलाई उजागर गर्छ। हाल अनन्तदीप सत्यजीत रे फ्लिम एण्ड टेलिभिजन ईन्स्टिच्युट (एसआरएफटीआई)- मा थप अध्ययन गरिरहेका छन् र आफ्नो चलचित्र यात्रालाई अगाडि बढाइरहेका छन्।
यो दोहोरो सफलता विभागमा रहेको सिर्जनशीलता, समर्पण र उत्कृष्टताको प्रतिविम्ब हो। यस्तो प्रतिष्ठित मञ्चमा आफ्ना पूर्वविद्यार्थीहरूको उपलब्धि देख्दा शिक्षक तथा विद्यार्थीहरू अत्यन्तै गौरवान्वित भएका छन्, जसले विभागलाई पहाडी क्षेत्रका उदाउँदा चलचित्र प्रतिभाहरूको केन्द्रका रूपमा थप सुदृढ बनाएकोछ।
