खरसाङ , 7 जुलाई (
निसं)ः खरसाङ बजारको वार्ड नम्बर 12 गड्डी लाईन नजिक शीश महल अनि कुमाई स्टुडियोको माझको जग्गामा धेरै समयदेखि फोहोर-मैला थुप्रिएर बसेको छ। यस स्थानमा धेरै समयदेखि विभिन्न प्रकारको फोहोर-मैलाका साथै प्लास्टिको बोतल, प्लास्टिकको थैला, पाउचहरू थुप्रिएर बसेकोले छ भने यहाँ थुप्रिएको फोहोर-मैला सफा गर्ने कार्य गरिएको अहिलेसम्म देखिएको छैन। यहाँको फोहोर-मैलाको बारेमा समचार पत्रमा खबर प्रकाशित भएपछि तत्कालिन वार्ड पार्षद पेम्बा जिम्बाले लगभग पाँच वर्ष अघि एक पल्ट यहाँको फोहोर-मैला सफा गर्ने कार्य गरेका थिए। त्यसपछि यहाँको फोहोर-मैला सफा गर्नको निम्ति कुनै कदम उठाइएको जानकारी छैन। यहाँको फोहोर-मैलाको कारण क्षेत्र दुर्गन्धित बनेको छ। यस स्थानमा कुमाई स्टुडियोको बल्डिङबाट फोहोर पानी बगेर आउने अनि शीश महलका मानिसहरूले पनि फोहोर पानी र फोहोर-मैला फाल्ने गरेकाले यो जग्गा फोहोरको दलदल र दुर्गन्धित बनेको छ। घाम लागेको समयमा यहाँको दुर्गन्ध हिमालय दर्पण कार्यालयका साथै वरिपरिको स्थानमा फैलिने गर्छ। कुमाई स्टुडियो अनि शीश महलको बीच भागमा रहेको यस स्थानलाई वरपरको बाटोबाट नदेखिने भएकोले यहाँ फोहोर-मैला थुप्रिएको बाटो हिँड़ने मानिसहरूले देख्दैनन् तथापि दुर्गन्ध भने थाहा पाउने गरेका छन्। यस स्थानमा जमा हुने फोहोर पानी र फोहोर-मैलामा डेङ्गु, मलेरिया जस्ता रोग फैलाउने लामखुट्टेको लार्भ हुर्कने पर्याप्त सम्भावना बनेको छ। यहाँको फोहोर-मैलाबाट निस्किएको दुर्गन्धको कारण मानिसहरूमा विभिन्न बिमारी फैलने सम्भावना पनि बनेको छ। यस जग्गाको फोहोर-मैला सफा गर्न अनि यहाँ फोहोर-मैला नफाल्नको निम्ति यहाँ बस्ने मानिसहरू अनि सम्बन्धित निकायहरूबाट कुनै पहल भएको देखिएको छैन। खरसाङमा गत बिहीवार प्लास्टिक मुक्त दिवस पालन गरिएको छ। प्लास्टिक मुक्त दिवस एउटा राम्रो पहल मानिलिन सकिन्छ। प्लास्टिक मुक्त दिवस पालन गरिनका साथै प्लास्टिकको जिनिस र थैलाहरूमाथि रोकथाम लगाउन सकिएको खण्डमा शहरमा फोहोर-मैला थुप्रिने क्रममा कमी अवश्यै आउनेछ अनि पर्यावरण प्रदुषण घटेर जानेछ। तर यसरी शहरको कुना-काप्चा, गल्ली-गलछेँड़ोहरूमा फालिएको फोहोर-मैला प्लास्टिकका थैला, बोतल, पाउचहरू सफा गर्न अति आवश्यक छ। यहाँ थुप्रिने अथवा फालिने फोहोर-मैला एउटा पुरानो समस्या भएकोले सम्बन्धित निकायले यस दिशामा कार्य गर्न आवश्यक छ। फोहोर-मैला, प्लास्टिकको बोतल, थैला, पाउच, विभिन्न जिनिसलाई यसरी नफालेर सही स्थानमा फाल्ने अथवा रिसाइकलको निम्ति पठाउने दायित्वलाई जनसाधरणले पनि बुझ्न पर्ने आवश्यक देखिएको छ।
