गुवाहाटीकी शिक्षिका हराइन्र् यापिडो चालकले खुलाए महत्वपूर्ण विवरण गुवाहाटीकी हराएकी शिक्षिका भावना शर्मा सम्बन्धी घटनामा नयाँ तथ्यहरू सार्वजनिक भएका छन्। उनलाई अन्तिम पटक छोड्ने र्यापिडो चालकले हराउनुअघि भएका गतिविधिबारे महत्वपूर्ण जानकारी दिएका छन्। रिपोर्टअनुसार, चालक सद्दाम हुसेनका अनुसार भावना शर्माले र्यापिडो बुक गर्दा गन्तव्य गुवाहाटी विश्वविद्यालय तय गरेकी थिइन्। तर उनी निर्धारित स्थानमा नउत्री बीचमै जलुकबारी इन्जिनियरिङ कलेज प्वाइन्टमा झार्न अनुरोध गरेकी थिइन्।चालकका अनुसार यात्राका क्रममा उनी निरन्तर फोनमा कुरा गरिरहेकी थिइन्, जुन व्यवहार असामान्य देखिएको थियो। साथै उनीसँग एउटा झोला पनि रहेको बताइएको छ। यसअघि प्रहरीले पनि उनका गतिविधिमा धेरै विरोधाभास देखिएको जनाएको थियो।
उनले आमालाई विद्यालयबाट बाँकी तलब लिन जाने बताएकी थिइन्, तर उनले सो विद्यालय छोडिसकेको जानकारीसमेत सार्वजनिक भएको छ। त्यस्तै, उनले विमानस्थल र अदाबारीतर्फ दुईवटा उबर बुक गरे पनि दुवै रद्द गरेको पाइएको छ। हराउनुअघि उनले एटीएमबाट करिब ७ हजार रुपैयाँ झिकेकी थिइन् भने उनको मोबाइल अन्तिम पटक पल्टन बजार क्षेत्रमा देखिएपछि बन्द भएको थियो। परिवारलाई पठाएको “म खतारामा छु” भन्ने सन्देश अनुसन्धानको मुख्य केन्द्र बनेको छ। पछि उनी शिलाङमा एक्लै भेटिएकी थिइन्, जहाँ उनको शरीरमा कुनै बाहिरी चोटपटक देखिएको थिएन। प्रहरीले घटनाका सबै पक्षबाट अनुसन्धान जारी राखेको जनाएको छ र वास्तविक कारण पत्ता लगाउन थप अनुसन्धान भइरहेको छ।
