मङ्पूका प्रतिभाशाली फिल्म निर्देशक सुजन लम्जेलले आफ्नो छोटो फिल्म “Dokoko Chahari (In the Shadow of the Bamboo Basket)” मार्फत, गान्तोकमा आयोजित अन्तर्राष्ट्रिय प्रतिस्पर्धामा प्रथम पुरस्कारसहित तीन लाख रुपैयाँ नगद जित्दै उल्लेखनीय सफलता हासिल गरेका छन्। यस उपलब्धिले मङ्पूलाई मात्र होइन, सम्पूर्ण क्षेत्रलाई नै गर्वको अनुभूति गराएको छ। भारतमा आधारित एक स्वतन्त्र फिल्ममेकरका रूपमा सुजन लम्जेलले Mass Communication and Journalism मा अध्ययन गरेका छन् र सन् २०१६ देखि सक्रिय रूपमा फिल्म निर्माणमा संलग्न छन्। उनले आफ्ना फिल्ममार्फत समाजका पछाडि पारिएका समुदायका सामाजिक तथा सांस्कृतिक विषयहरूलाई उजागर गर्दै सशक्त कथावाचन प्रस्तुत गर्दै आएका छन्।
स्वतन्त्र परियोजनासँगै उनले Chief Assistant Director का रूपमा आठवटा फिचर फिल्म तथा थुप्रै छोटा फिल्महरूमा अनुभव बटुलेका छन्। साथै Dettol, Aashirvaad Salt, Red Label, Aquaguard, Federal Bank, ICICI Lombard जस्ता चर्चित ब्रान्डहरूसँग १५ भन्दा बढी विज्ञापनमा पनि सहकार्य गरेका छन्। सन् २०२३ मा , मुम्बईमा बौद्धयान मुखर्जी अनि मोनालिसा मुखर्जीको मार्गदर्शनमा आफ्नो सीप अझ परिष्कृत गरेका थिए। उक्त अनुभवले उनको कथावाचन शैलीलाई अझ गहिरो र प्रभावकारी बनाएको छ।
सन् २०२५ मा उनले आफ्नै प्रोडक्सन हाउस अन्तर्गत आफ्नो पहिलो छोटो फिल्म “In the Shadow of the Bamboo Basket” निर्माण गरेका हुन्, जसले अहिले विभिन्न फिल्म महोत्सवहरूमा सहभागिता जनाइरहेको छ। दार्जीलिङका चियाबगानको परिवेशमा आधारित यो फिल्मले पुस्तौँदेखिको गरिबीको कथा प्रस्तुत गर्दछ।
उनका प्रमुख कामहरूमा “Dokoko Chahari” (2025), “A Day in Mumbai” (2024), “The Menstrual Revolution” (2019), “The Forgotten Heritage” (2018) र “Nauratha, a Tale of Nine Days” (2017) समावेश छन्। सुजन लम्जेल मङ्पूको मात्र होइन, सम्पूर्ण गोर्खा समाजका लागि प्रेरणाका स्रोत हुन् भने एक साँचो गौरव, एक उज्यालो नक्षत्र भएको दावी गरिएको छ।
