भारतीय प्रौद्योगिकी संस्थान (IIT) गुवाहाटीमा वैज्ञानिक तथा नवप्रवर्तनकर्ता (Innovator) का रूपमा कार्यरत असमका प्रख्यात वैज्ञानिक डा. सागर भट्टराईले विश्वकै प्रतिष्ठित SCI Q1 श्रेणीको अन्तर्राष्ट्रिय वैज्ञानिक जर्नलमा आफ्नो अनुसन्धान प्रकाशित गराउन उल्लेखनीय सफलता हासिल गर्नुभएको छ। धैर्य, आत्मविश्वास र निरन्तर संघर्षले असम्भव जस्तो देखिने लक्ष्य पनि हासिल गर्न सकिन्छ भन्ने प्रेरणादायी उदाहरण उहाँले प्रस्तुत गर्नुभएको छ। डा. सागर भट्टराईले भारत, रुस, इराक र साउदी अरेबियाका अनुसन्धानकर्तासँगको सहकार्यमा सौर्य ऊर्जाका लागि नवीन २D/३D संरचनायुक्त सामग्रीसम्बन्धी अनुसन्धान सन् २०२५ अप्रिल १७ मा प्रकाशनका लागि विश्वस्तरीय जर्नलमा पेश गर्नुभएको थियो। त्यसपछि उक्त अनुसन्धान करिब १०–१२ जना गोप्य समीक्षकबाट लामो र गहन मूल्याङ्कन प्रक्रियामा समावेश गरिएको थियो।
समीक्षाका क्रममा पटक–पटक उठाइएका जटिल प्रश्न, आलोचना र वैज्ञानिक चुनौतीहरूको सामना गर्दै डा. भट्टराईले प्रत्येक जिज्ञासाको तथ्य, प्रमाण र वैज्ञानिक आधारसहित धैर्यपूर्वक जवाफ दिनुभयो। करिब एक वर्ष तीन महिनासम्म चलेको कठोर समीक्षा प्रक्रियापछि अन्ततः सबै समीक्षकहरूले अनुसन्धानलाई स्वीकार गर्दै प्रकाशनका लागि स्वीकृति दिएका छन्। यस उपलब्धिलाई आफ्नो वैज्ञानिक जीवनको अत्यन्त महत्वपूर्ण अनुभवका रूपमा वर्णन गर्दै डा. भट्टराईले भन्नुभएको छ, “जति कठिन परिस्थिति आए पनि कहिल्यै हार मान्नु हुँदैन। निरन्तर संघर्ष र धैर्य नै सफलताको सबैभन्दा ठूलो आधार हो।”
हालसम्म १५० भन्दा बढी अन्तर्राष्ट्रिय अनुसन्धान–पत्र प्रकाशित गरिसक्नुभएका डा. सागर भट्टराईले आफ्नो सफलताको श्रेय ईश्वरप्रतिको अटल विश्वास, अथक मेहनत, अनुसन्धानप्रतिको समर्पण तथा अन्तर्राष्ट्रिय सहकार्यलाई दिनुभएको छ। उहाँका अनुसार यस अनुभवले भविष्यका अनुसन्धानप्रति अझ दृढ आत्मविश्वास र नयाँ ऊर्जा प्रदान गरेको छ। डा. सागर भट्टराईको यो प्रेरणादायी यात्रा विज्ञान तथा अनुसन्धान क्षेत्रमा लागेका युवा वैज्ञानिक, विद्यार्थी र अनुसन्धानकर्ताका लागि संघर्ष, धैर्य र आत्मविश्वासको सशक्त उदाहरण बनेको छ। कठिनाइ अन्त्य होइन, सफलताको यात्रामा आउने महत्वपूर्ण चरण हो भन्ने सन्देश उहाँको उपलब्धिले दिएको छ।
