दार्जीलिङ,31 जनवरी(निसं): दार्जीलिङ पहाडी क्षेत्रमा अवस्थित रङली चिया बगानमा गत महिनौदेखि बेतन तथा दैनिकी रोजी नपाउँदा श्रमिक तथा कर्मचारीहरू गम्भीर आर्थिक संकटमा परेका छन्। आफ्नै पसिनाले चिया बगान जोगाइरहेका श्रमिकहरू आज घरखर्च, बालबालिकाको पढाइ तथा औषधोपचार जस्ता आधारभूत आवश्यकतासमेत पूरा गर्न नसक्ने अवस्थामा पुगेको
यस गम्भीर समस्यालाई ध्यानमा राख्दै गोर्खाल्याण्ड क्षेत्रीय प्रशासनका प्रमुख कार्यपाल अनित थापाले राज्यका श्रम मन्त्री मलय घटकलाई सम्बोधन गरी पत्र पठाएका छन्। उक्त पत्र गोर्खाल्याण्ड क्षेत्रीय प्रशासन डेपुटी चियरमेन राजेश चौहानले कलकता पुगेर शुक्रबार श्रम मन्त्रीलाई हस्तान्तरण गरिएको जानकारी छ।
यसबारे थप जानकारी अनुसार, डेपुटी राजेश चौहानले कोलकाता बाट जानकारी दिए अनुसार, यो पत्र रङली चिया बगानका सयौँ श्रमिकहरूको पीडा, अपेक्षा र न्यायको माग बोकेको महत्वपूर्ण दस्तावेज हो। पत्र बुझ्दै श्रम मन्त्री मलय घटकले समस्याप्रति गम्भीर चासो व्यक्त गर्दै विभागीय अधिकारीहरूलाई चियावगानका मालिक पक्षसँग तत्काल बैठक बसेर समाधान निकाल्न कडा निर्देशन दिएका छन्।
उनले भने, श्रम मन्त्रीले देखाएका संवेदनशीलताले राज्य सरकार श्रमिकहरूको समस्याप्रति सचेत रहेको छ। लामो समयदेखि अन्याय सहँदै आएका रङली चियावगानका श्रमिकहरूमा यस कदमले आशाको नयाँ किरण पलाएको छ।चौहानले थप भने, यद्यपि श्रमिक पक्षले निर्देशन केवल कागजमै सीमित नरही व्यवहारमा लागू हुनुपर्ने माग गरेका छन्। उनीहरू दया होइन, आफ्नो अधिकार चाहन्छन्, समयमा नै वेतन, सम्मानजनक जीवन र सुरक्षित भविष्य। मालिक पक्षले चियावगानलाई केवल व्यापारको रूपमा होइन, श्रमिकहरूको जीवनसँग गाँसिएको संवेदनशील विषयका रूपमा बुझ्नुपर्ने श्रमिकहरूको भनाइ छ।रङली चिया बगानमा उठाइएको यो कदमले यदि श्रमिकहरूको पीडामा राहत दिन सके, त्यो केवल श्रमिकहरूको जित मात्र नभई मानवता र न्यायको पनि जित हुने विश्वास व्यक्त गरिएको छ।
