दार्जीलिङ, 19 जुलाई: गोर्खा जनमुक्ति मोर्चा (गोजमुमो) पुल–बिजनबारी–गोक समष्टिले शनिबार गोक क्षेत्रबाट जनसम्पर्क तथा जनसंवाद अभियानको औपचारिक शुभारम्भ गरेको छ। अभियानअन्तर्गत गाउँ–गाउँ पुगेर स्थानीयवासीसँग प्रत्यक्ष संवाद गर्ने, जनसमस्याको जानकारी लिने तथा समाधानका लागि आवश्यक पहल गर्ने उद्देश्य रहेको पार्टीले जनाएको छ।
अभियानको सुरुवातसँगै गोजमुमोको टोलीले गोक बजार नजिकको पहिरो प्रभावित क्षेत्रको स्थलगत निरीक्षण गर्दै प्रभावित परिवारहरूसँग भेटघाट गरेको थियो। टोलीले पहिरोपीडितका समस्या सम्बन्धित निकायसम्म पुर्याउने तथा आवश्यक सहयोगका लागि सक्दो पहल गर्ने प्रतिबद्धता व्यक्त गरेको छ।
यसैक्रममा टोलीले गोक–१ ग्रामका विभिन्न गाउँ तथा गोक–२ ग्रामअन्तर्गत नेजी, पदेङ, कोलबुङ र मुर्मिदाङलगायतका बस्तीहरूमा पुगेर स्थानीयवासीसँग भलाकुसारी गर्दै उनीहरूका गुनासा, सुझाव र आवश्यकताबारे जानकारी लिएको थियो।
कार्यक्रममा गोजमुमो नेता भीम सुब्बाले समष्टिअन्तर्गत पर्ने प्रत्येक गाउँ र बस्तीमा पुगेर जनताका समस्या र आवश्यकतालाई प्राथमिकताका साथ सम्बोधन गरिने बताए। उनले गोर्खा समुदायको लामो समयदेखिको न्यायोचित माग भारतीय संविधानको दायराभित्र रहेर पूरा गर्न सबै पक्ष एकताबद्ध हुनुपर्नेमा जोड दिए।
उनले केन्द्र र राज्यमा रहेको “डबल इन्जिन सरकार” गोर्खा समुदायका मागप्रति सकारात्मक रहेको उल्लेख गर्दै यो अवसरलाई सदुपयोग गर्दै साझा उद्देश्यका साथ अघि बढ्न सबैलाई आह्वान गरे।
गोजमुमोले आगामी दिनहरूमा पनि समष्टिका विभिन्न क्षेत्रमा जनसम्पर्क अभियानलाई निरन्तरता दिँदै स्थानीय जनताका समस्या संकलन गरी समाधानका लागि सम्बन्धित निकायसँग आवश्यक समन्वय गर्ने जनाएको छ।
