गोर्खा मदर्स वेलफेयर सोसाइटी नयाँ दिल्लीले एउटा कार्यक्रमको आयोजन गरी प्रतिभाशाली गोर्खा विद्यार्थीहरूलाई सम्बर्द्धना जनाएको थियो। नयाँ दिल्लीको सफदरजङ्ग एन्क्लेव अवस्थित गोर्खा वेलफेयर सेन्टरमा आयोजित कार्यक्रमको अध्यक्षता गोर्खा मदर्स वेलफेयर सोसाइटीका संस्थापिका प्याट्रिसिया निकोेलसद्वारा गरिएको थियो। प्रमुख अतिथिका रुपमा साहित्यकार तथा विशिष्ट समाजसेवी उत्तम कुमार छेत्री थिए। विशिष्ट अतिथिहरूमा अवकाशप्राप्त कर्णल तथा विशिष्ट समाजसेवी सुकुल प्रधान, सक्रिय समाजसेवी राजु शङ्कर अनि अरू गन्यमान्य व्यक्तिहरूको उपस्थिति रहेको थियो। सोसाइटीकी अध्यक्ष अनु शिल्पकारको उपस्थिति रहेको कार्यक्रममा राष्ट्रियस्तरका खेलाडी अनमोल शङ्कर, अन्तर्राष्ट्रियस्तरकी खेलाडी शालु मंग्राती, राष्ट्रियस्तरका खेलाडी रिवाङ लामालाई सम्बर्द्धना जनाइएको थियो। यसरी नै दिल्लीवासी 90 वर्षीय गोर्खा वृद्धा सोममाया बराइलीलाई पनि सम्मान जनाइएको थियो। यसै गरी मार्शल आर्ट खेलाडी आयन लेप्चालाई पनि सम्मान जनाइएको थियो। सम्मानितहरूलाई कर्णल सुकुल प्रधान, उत्तम कुमार छेत्री, राजु शङ्कर अनि अरूको बाहुलीबाट सम्मान अलङ्करण गरिएको थियो। क्रमशः सोसाइटीका कार्यक्रमहरू सफल पार्न सहयोग दिने राजु शङ्कर, मीरा ढुङ्गाना, गीता तामाङ गुरूङ, रञ्जु परियार अनि अरूलाई प्रशन्सा-पत्र प्रदान गरियो। कार्यक्रमको सञ्चालन सोसाइटीकी सचिव कविता गुरूङ राई अनि कार्यकारी सदस्य नोमी खातीले गरेका थिए।
स्मरण रहोस्, वर्ष 2015 मा स्थापित गोर्खा मदर्स वेलफेयर सोसाइटी नयाँ दिल्लीले गोर्खा जाति, समाज र देशकै निम्ति विभिन्न सीपमूलक र विकासका कार्यहरू गर्दै आइरहेको छ। यसका लागि सोसाइटीका सम्पूर्ण कार्यकर्ताहरूको योगदान महत्वपूर्ण रहेको छ। यसैक्रममा प्रतिभाशाली विद्यार्थीहरू, वयोवृद्धा महिला र अन्यलाई सम्मान जनाएको हो।
