चुनाव नजिकिँदै गर्दा सिलगडीमा पोस्टर तथा ब्यानर बिगारिएको आरोपलाई लिएर राजनीतिक वातावरण तनावपूर्ण बन्दै गएको छ। यसैबीच, पुलीसको अनुसन्धान प्रक्रियाले थप विवाद सिर्जना गर्दै भारतीय जनता पार्टी (भाजपा) का कार्यकर्ताहरू सडकमा उत्रिएका छन्।प्राप्त जानकारीअनुसार, घटनाको सुरुवात पोस्टर तथा चुनावी सामग्री बिगारिएको सम्बन्धमा दर्ता गरिएको उजुरीबाट भएको हो। उक्त उजुरी तृणमूल कांग्रेसको तर्फबाट दर्ता गरिएको बताइएको छ। सोही आधारमा पुलीसले अनुसन्धान अगाडि बढाउँदै एक जना भाजपा कार्यकर्ताको घरमा पुगेपछि स्थिति तनावपूर्ण बनेको हो। पुलीस टोली उक्त घरमा पुगेपछि भाजपा नेताहरू तथा समर्थकहरू ठूलो संख्यामा भेला भएका थिए। यस क्रममा शङ्कर घोष घटनास्थलमा पुगेर पुलीस अधिकारीसँग विवादमा उत्रिएका थिए। स्थिति केही समयका लागि तनावग्रस्त बनेको थियो।
घटनापछि शंकर घोष नेतृत्वको टोलीले पानीट्याङ्की आउट पोस्टसम्म मार्च गर्दै विरोध प्रदर्शन गरेको थियो। उनले आरोप लगाउँदै भने कि चुनावअघि जानाजानी भाजपा कार्यकर्ताहरूलाई लक्षित गर्दै एकपक्षीय कारबाही भइरहेको छ, जुन लोकतान्त्रिक वातावरणविरुद्ध रहेको उनको दाबी छ। अर्कोतर्फ, यसअघि पनि विभिन्न स्थानहरूमा पोस्टर च्यातिएको, फ्लेक्स हटाइएको तथा झण्डा हटाइएको जस्ता घटनाहरू सार्वजनिक भइसकेका छन्। तृणमूल कांग्रेसले यस्ता गतिविधिमा भाजपा कार्यकर्ताहरूको संलग्नता रहेको आरोप लगाएको छ भने भाजपा पक्षले उक्त आरोप अस्वीकार गर्दै निष्पक्ष अनुसन्धानको माग गरेको छ। यस घटनाले चुनावी माहोलमा राजनीतिक दलहरूबीचको टकराव झन् चर्किँदै गएको संकेत गरेको छ। स्थानीय प्रशासनले अवस्था नियन्त्रणमा रहेको जनाउँदै निष्पक्ष अनुसन्धान गरिने आश्वासन दिएको छ।
