नाम्ची जिल्लाको ०९ बर्फुङ्ग क्षेत्र अन्तर्गत बोरोङ्ग जीपीयुमा पर्ने बर्मेली पुलको निर्माण कार्य क्षेत्रका माननीय विधायक रिकसल दोर्जी भोटियाको पूर्ण पहलमा सफलतापूर्वक सम्पन्न भई हाल औपचारिक रूपमा सञ्चालनमा आएको छ। पुल सञ्चालनमा आएपछि स्थानीय बासिन्दाहरूले माननीय विधायक रिकसल दोर्जी भोटिया तथा बाटो र पुल विभागप्रति गहिरो कृतज्ञता व्यक्त गरेका छन्। यस पुलले दक्षिण सिक्किमको राबोङ्गदेखि पश्चिम सिक्किमको कर्जी–मङ्गनमसम्मको आवत–जावतलाई सहज र सुरक्षित बनाएको छ। यसअघि उक्त पुल अत्यन्त जोखिमपूर्ण अवस्थामा रहेको थियो। दैनिक यात्रु, विद्यार्थी तथा सर्वसाधारण नागरिकहरूले लामो समयदेखि आवत–जावतमा ठूलो कठिनाइ र जोखिमको सामना गर्नुपरेको थियो।
स्थानीय जनताको समस्यालाई गम्भीरतापूर्वक मध्यनजर गर्दै माननीय विधायक रिकसल दोर्जी भोटियाको सक्रिय पहलमा, रालाङ–बोरोङ ट्येरोटोरी क्षेत्रकी जिल्ला पञ्चायत सदस्य सुश्री आञ्जना शर्मा, बाटो र पुल विभाग, पञ्चायत गण तथा सम्बन्धित सरकारी निकायहरूको संयुक्त प्रयासबाट पुलको निर्माण कार्य समयमै सफलतापूर्वक सम्पन्न गरिएको हो।
पुल निर्माण सम्पन्न भएसँगै हाल उक्त क्षेत्रमा आवत–जावत सहज, सुरक्षित र भरपर्दो बनेको छ। साथै पुलसँग सम्बन्धित सडकमा कार्पेटिङ्ग कार्यसमेत बाटो र पुल विभागद्वारा तीव्र गतिमा अगाडि बढाइरहेको जनाइएको छ। स्थानीय बासिन्दाहरूले यस महत्वपूर्ण पूर्वाधार विकासका लागि माननीय विधायक रिकसल दोर्जी भोटियाको नेतृत्व, दूरदृष्टि र जनमुखी पहलको खुलेर प्रशंसा गरेका छन्।
