दार्जीलिङ,28 जुलाई(निसं): दार्जीलिङ सदर-1 समष्टिमा सहिद दिवस एक विशेष श्रद्धासुमन सहित भावपूर्ण वातावरणमा मनाइएको छ। समष्टि अध्यक्ष अमृत योञ्जनको अध्यक्षता सम्पन्न कार्यक्रममा उपस्थित सम्पूर्ण जनसमुदायले सहिदहरूको अतुलनीय बलिदानप्रति गहिरो श्रद्धाञ्जली अर्पण गरे।
कार्यक्रमको शुभारम्भ धर्मगुरु लामाहरूको मन्त्रोच्चारणका साथ भएको थियो। सहिदहरूको आत्माले चिरशान्ती पाउन भनेर गरिएको पूजा, प्रार्थना र मन्त्रोच्चारणले उपस्थित सम्पूर्ण वातावरणलाई आध्यात्मिक रूपमा भावविभोर बनायो। त्यसपछि सहिद वेदिमा माल्यार्पण गरी सहिदहरूलाई सम्मानपूर्वक सम्झना गरियो भनी समष्टि मिडिया सेलले जानकारी गराएको छ।
सहिदहरु माथिको सम्बोधनमा, अध्यक्ष अमृत योञ्जन भावुक हुँदै भने, सन् 2017 सालमा आफ्नै सामुन्ने बिमल शाशंकरले प्राण त्याग गरेको सम्झना गर्दै, उनले सहिदहरूको बलिदानलाई केवल इतिहासको पानामा सीमित नराखी, वर्तमान र भविष्यको पथ प्रदर्शक मान्नुपर्ने आवश्यकता बताए।
कार्यक्रमको अन्त्यमा सहिद परिवारहरूप्रति कृतज्ञता स्वरूप सम्मान स्वरूप केही भेट कोशेली प्रदान गरिएको थियो। उक्त कार्यक्रमले सहिदहरूको स्मृतिलाई अझ गहिरो बनाउँदै, सम्पूर्ण समुदायमा एकता, जागरण र कर्तव्यबोधको भावना थप बलियो बनाएको छ भनी मिडिया सेलले बताएको छ।
