रिम्बिक,5 मार्च(निसं): रिम्बिक-लोधोमा समष्टि अन्तर्गत झेपी ग्राम पञ्चायतको बतासे खेल मैदानमा हिमालयन स्पोर्टिङ क्लब-द्वारा आयोजित लोसार कप-2026 को दोस्रो संस्करण भव्य रूपमा समापन भयो। कार्यक्रमको प्रमुख अतिथि जीटीए पर्यटन विभागिय प्रमुख तथा क्षेत्रीय सभासद नोर्देन शेर्पा उपस्थित थिए भने विशिष्ट अतिथिहरूमा कर्म अध्यक्ष मिलन प्रधान, ग्राम पञ्चायत सदस्यहरू थिए भने क्षेत्रका अन्य वरिष्ठ व्यक्तित्वहरूको उपस्थिति रहेको थियो। पारम्परिक अनि सांस्कृतिक प्रदर्शनीसँगै सुरु भएको कार्यक्रममा लोसार विषयमा पनि वक्ताहरुले प्रकाश पारेका थिए। लोसर कप-2026 फुटबल प्रतियोगितामा ब्रदरहुड सिक्किम अनि उत्तम सेभेन सुम्बुकमाझ भिडन्त भयो।
खुबै रोमाञ्चक म्याचमा निर्धारित समयसम्म बराबरीमा खेलेपछि टाइ-ब्रेकरमा पुगेको थियो। टाइ–ब्रेकरमा उत्तम सेभेन सुम्बुकले ब्रदरहुड सिक्किमलाई 6-5 गोल अन्तरले पराजित गर्दै लोसार कप-2026 को उपाधि जित्न सफल भयो। खेलभरि दुवै टोलीले उत्कृष्ट प्रदर्शन गरेका थिए। आकर्षक ट्रफीकासाथ एक लाख 55 हजार रुपियाँ उत्तम सेभेन सुम्बुकले आफ्नो झोलीमा पारे भने पराजय टिम ब्रदरहुड सिक्किमले एक लाख 5 हजार रुपियाँसहित आकर्षक ट्रफी प्रदान गरियो।
फाइनल खेलका म्यान अफ द म्याच उत्तम सेभेनका खेलाडी सरजन लिम्बु घोषित भए भने म्यान अफ द सिरिज ब्रदरहुड सिक्किमका सोनु हाङ लिम्बु बने।
यसैगरी, भेटेरन्स कप फाइनलमा डाली मिक्सअप भेटेरन्सले भेनस नेपाललाई 4-1 गोल अन्तरले पराजित गरेको छ। आरएसएससी फेन्चेटारलाई बेस्ट टिम घोषित गरिएको छ भने यस टिमका डानिस क्षेत्री बेस्ट गोलकिपर घोषित भए भने आरएसएससी फेन्चेटारका एक खेलाडी हाइएस्ट गोल स्कोरर बने। प्रतियोगिता सफल बनाउन सहयोग गर्ने सम्पूर्ण अतिथि, खेलाडी, प्रायोजक तथा दर्शकप्रति आयोजक क्लबले आभार व्यक्त गरेको छ। लोसार कपले स्थानीय स्तरमा खेलकुद विकास, आपसी एकता र भाईचारा प्रवर्द्धन गर्न महत्वपूर्ण योगदान पुर्याएको आयोजकले जनाएकोछ।
