४ फरवरीदेखि सुरु भएको २१औँ क्याप्टेन जिन्तु गोगोई, वीर चक्र स्मृति फुटबल प्रतियोगिता असमको डिब्रुगढ जिल्ला अन्तर्गत दुलियाजन स्थित नेहरू खेल मैदानमा भव्य रूपमा सम्पन्न भयो। प्रतियोगिता भारतीय सेनाद्वारा आयोजना गरिएको कार्यक्रममा वीर शहीद क्याप्टेन जिन्तु गोगोई का पिता थोइराम गोगोई तथा माता श्रीमती दुलुप्रभा गोगोई मुख्य अतिथिका रूपमा उपस्थित हुनु भयो। साथै भारतीय सेनाका जनरल अफिसर कमाण्डिङ लेफ्टिनेन्ट जनरल अभिजित एस. पेन्धारकर (एभिएसएम, वाईएसएम) सहित उच्च अधिकारी तथा विशिष्ट व्यक्तित्वहरूको उपस्थिति रहेको थियो।
कार्यक्रममा खुकुरी नृत्य, भांगड़ा नृत्य, Assam Rifles द्वारा डग शो, झूमर नृत्य तथा अन्त्यमा बिहु नृत्य प्रस्तुत गरियो। Assam Rifles को पाइप ब्यान्ड प्रदर्शनले कार्यक्रमलाई अझ आकर्षक बनायो।
प्रतियोगिताको फाइनल खेल लेखाङ स्पोर्ट्स क्लब र बारेकुरी एफ.सी. बीच भएको अत्यन्त रोमाञ्चक प्रतिस्पर्धामा लेखाङ स्पोर्ट्स क्लब विजयी भयो। विजेता टोलीलाई ११ लाख रुपैयाँसहित ट्रफी र उपविजेतालाई ७ लाख ५० हजार रुपैयाँ प्रदान गरियो। उत्कृष्ट खेलाडीहरूको प्रदर्शनले दर्शकहरू मन्त्रमुग्ध बने।
हरेक वर्ष माथिल्लो असमको तिनसुकिया क्षेत्रमा आयोजना हुँदै आएको यस प्रतियोगिताले क्याप्टेन जिन्तु गोगोईको साहस, देशभक्ति र समर्पणलाई स्मरण गराउँदै युवापुस्तामा राष्ट्रप्रेम र अनुशासनको भावना जगाउँदै आएको छ। उहाँ १७ गढवाल राइफल्स मा सेवा गर्दै १९९९ को कार्गिल युद्धमा वीरगति प्राप्त गरी वीर चक्रबाट सम्मानित हुनुभएको थियो।
