सब-इन्स्पेक्टर भर्तीमाथि CAP र SDF को झुटो आरोप

CAP र SDF द्वारा SPSC SI भर्ती प्रक्रियामाथि गरिएको मनगढन्ते आरोप: राजनीतिक रूपमा प्रासंगिक देखिन चाहनेहरूको हताश प्रयास भएको एसकेएम प्रेस तथा पब्लिसिटी सेल रिनोक, सिक्किमकी अध्यक्ष, श्रीमती रञ्जना प्रधानले बताएकी छिन्। हालै, CAP र SDF ले SPSC सब-इन्स्पेक्टर भर्ती प्रक्रियामाथि फेरि एक पटक मनगढन्ते आरोप लगाउँदै बदनाम गर्ने प्रयास गरेका छन्। यी आरोपहरू केवल आधारहीन मात्र होइनन् — यिनले ती राजनीतिक दलहरूको दिवालियापन र असुरक्षा पनि उजागर गर्छन्, जसले बारम्बार जनताको विश्वास जित्न असफल हुँदै आएका छन्।
सबैभन्दा पहिले, सिक्किम सानो राज्य हो जहाँ मानिसहरू एक–अर्कोलाई व्यक्तिगत, सामाजिक वा राजनीतिक रूपमा चिन्छन्। शासन पक्षमा राज्यका सबै ३२ वटा निर्वाचन क्षेत्रको अपार विश्वास रहेको अवस्थामा, विभिन्न क्षेत्रका व्यक्तिहरूको सरकार वा सत्ता पक्षसँग कुनै न कुनै प्रकारको चिनजान हुनु स्वाभाविक कुरा हो। तर विपक्षको कथनले संकेत गर्छ कि सत्तारुढ पक्षलाई समर्थन गर्ने जो–कोहीलाई प्रतिस्पर्धात्मक परीक्षाबाट स्वचालित रूपमा अपात्र ठहरिनुपर्छ। यस्तो तर्क हास्यास्पद, अपरिपक्व र योग्यता–आधारित प्रणालीप्रति नै अपमान हो। यदि विपक्षका नजरमा सत्ता पक्षलाई समर्थन गर्नु नै “अपराध” हो भने, उनीहरूले जवाफ दिनुपर्छ, के प्रतिस्पर्धात्मक परीक्षा केवल आफ्ना समर्थकहरूले मात्र दिन पाउने व्यवस्था हुनुपर्छ ? उनीहरूको तर्कले नै उनीहरूले दाबी गर्ने समानता, निष्पक्षता र अवसरका मूलभूत सिद्धान्तहरूलाई कमजोर बनाउँछ। यसबाहेक, उनीहरूले गरेको आरोप कुनै पनि छानबिनमा कहिल्यै प्रमाणित हुन सकेको छैन। न त SPSC ले, न त कुनै अदालतले यस्ता आरोपहरूलाई कहिल्यै पुष्टि गरेको छ। उनीहरूको भनाइ अधिकतम सामाजिक सञ्जालका हल्ला, एडिट गरिएको स्क्रीनसट र अधकचरा अनुमानमा आधारित हुन्छ। प्रत्येक भर्ती प्रक्रियामा उनीहरूको यही पुरानै नाटक पुन: दोहोरिन्छ, र प्रत्येक पटक जनमतको अदालतमा उनीहरू स्वयं नै लज्जित हुन्छन्।
श्रीमती रञ्जना प्रधानले भऩिन्, अब चुनावी यथार्थ पनि नबिर्सौँ- मात्र करिब ६ प्रतिशत मत ल्याउने र एकल पञ्चायत सिट समेत जित्न नसक्ने दलहरू नै आज राज्यलाई पारदर्शिताबारे उपदेश दिन उद्यत छन्। चुनावी असफलताबाट उत्पन्न भएको उनीहरूको निराशा अहिले सामाजिक सञ्जालका क्याम्पेन, लाइभ भिडियो र युवालाई भ्रममा पार्ने बनावटी कथामा झल्किन्छ।
व्यंग्यास्पद कुरा के छ भने- यिनै दलहरू, जसले दशकौँसम्म नाता–गोता प्रथादेखि लिएर खुला भ्रष्टाचार र मनपरीतासम्मका सबै दुर्व्यवहार गरे, आज आफैंलाई इमानदारीका ठेकेदारका रूपमा प्रस्तुत गर्न खोजिरहेका छन्। जनता अझै बिर्सेका छैनन्- उनीहरूको शासनकालमा भएको ब्याकडोर नियुक्ति, राजनीतिक पक्षधरता, र सत्ताको दुरुपयोग। आज जब भर्ती प्रक्रिया अझ बढी पारदर्शी, व्यवस्थित र उत्तरदायी भएको छ, उनीहरू असहज बनेका छन्- किनकि उनीहरूको पुरानो प्रभावशाली प्रणाली अब चल्दैन।
वास्तवमा, उनीहरूको असन्तुष्टि SPSC वा SI भर्ती प्रक्रियासँग होइन- उनीहरूको वास्तविक रोष सिक्किमका जनतासँग हो, जसले चुनावपछि चुनाव उनीहरूलाई अस्वीकार गर्दै आएका छन्। आत्ममूल्यांकन गर्न असफल भएर, उनीहरू नकारात्मकता, हल्लाखबर र राजनीतिक स्टन्टमा मात्र सीमित भएका छन्।
युवाहरूसँग करियर मार्गदर्शन वा सहयोग गर्ने ठाउँमा, उनीहरूले डर, शंका र भ्रम फैलाएर परीक्षार्थीहरूको मनोबल गिराइरहेका छन्। यो केवल गैरजिम्मेवार होइन- निकै खतरनाक पनि हो। यसले वर्षौँसम्म कडा मिहिनेत गरेर प्रतिस्पर्धात्मक परीक्षा तयारी गर्ने परिश्रमी विद्यार्थीहरूको आत्मविश्वास कमजोर पार्छ। सिक्किमका जनता बुद्धिमानी छन्- र सधैँ सत्यको साथमा उभिएका छन्। आगामी चुनावले फेरि एक पटक यिनै हल्लामैत्री दलहरूको वास्तविक स्थिति देखाउनेछ। सामाजिक सञ्जालका नाटकले केही समयका लागि ताली त पाउन सक्छ, तर शासन प्रशासन कुनै सर्कस होइन- र सिक्किमका जनता सामाजिक सञ्जालको नाटकका आधारमा भोट दिँदैनन्। समय आएपछि फेरि प्रमाणित हुनेछ- सत्य, पारदर्शिता र सुशासनको आवाज झूट, आरोप र बदनाम अभियानभन्दा सधैँ बलियो हुन्छ। SPSC को छनौट प्रक्रिया निष्पक्षता र योग्यताका आधारमा अघि बढिरहनेछ, र CAP वा SDF ले फैलाएका कुनै पनि भ्रमहरूले जनताको संस्थाप्रतिको विश्वास डग्मगाउन नसक्ने श्रीमती रञ्जना प्रधानले बताइन्।