बुक-आण्ट पब्लिकेशन हाउस, सिलगढ़ीको नयाँ प्रकाशन एकाइ (इम्प्रिन्ट) स्यालमेण्डर इम्प्रिन्ट्स-ले दार्जीलिङ सम्बन्धी ऐतिहासिक कृति दार्जीलिङ टु डिस्ट्यान्ट डेस्टिनेसन्स-को विमोचनसँगै आफ्नो औपचारिक शुभारम्भ गरेको छ। बेस्टसेलर इतिहासकार डा. सोनाम बी. वाङ्ग्यालद्वारा लिखित उक्त कृतिको विमोचन आइतबार सिलगढ़ीस्थित गुरुङ नगरको किताब क्याफेमा सम्पन्न भयो।
कार्यक्रमको मुख्य आकर्षण डा. सोनाम बी. वाङ्ग्याल र कार्यक्रमका सहजकर्ता डा. सत्यदीप एस. छेत्रीबीच भएको गहन संवाद थियो। सो अवसरमा डा. छेत्रीले प्रसिद्ध यात्रु इब्न बतुत्ताको भनाइ उद्धृत गर्दै भने, “नयाँ स्थानमा जाँदा शुरुमा मानिस मौन हुन्छ, अनि पछि ऊ कथाकार बन्छ,” र यस भनाइलाई डा. वाङ्ग्यालले पूर्ण रूपमा प्रतिनिधित्व गर्ने व्यक्तित्वका रूपमा उल्लेख गरे।
आफ्ना विचार राख्दै डा. वाङ्ग्यालले ‘ब्रान्ड दार्जीलिङ’ र ‘ब्रान्ड गोर्खा’ को विषयमा चर्चा गरे। उनले विश्वभरि इत्र, सिगार, मदिरा तथा वस्त्रजस्ता उत्पादनहरूमा यी नामहरूको व्यापक प्रयोग भइरहेको उल्लेख गर्दै, समुदायका रूपमा हामीले यस ब्रान्ड मूल्यलाई उपयोग गर्न पर्याप्त पहल नगरेको र विश्व बजारमा यस क्षेत्रको वास्तविक मूल्य पहिचान गर्न असफल भइरहेको बताए। उनले यस पुस्तकलाई क्षेत्रको ब्रान्ड मूल्यप्रति व्यापक चेतना सिर्जना गर्ने आँखेखोल्ने कृतिका रूपमा वर्णन गरे।
उक्त पुस्तकको औपचारिक विमोचन डा. पी. के. छेत्री, डा. रिन्जी इडेन वाङ्दी, ज्ञानेन्द्र खतिवडा तथा डा. सत्यदीप एस. छेत्रीको करकमलबाट सम्पन्न भयो। यस अवसरमा स्यालमेण्डर इम्प्रिन्ट्सद्वारा लेखक डा. वाङ्ग्याललाई सम्मानित गरियो। कार्यक्रमको समापन बुक-आण्ट पब्लिकेशन हाउसका सल्लाहकार तथा अनुवादक नरेश के. शाहीद्वारा धन्यवाद ज्ञापनसहित गरिएको थियो।
कार्यक्रममा प्रमुख अतिथिका रूपमा डा. पी. के. छेत्री तथा विशिष्ट अतिथिका रूपमा डा. रिन्जी इडेन वाङ्दीको उपस्थिति रहेको थियो। आफ्नो सम्बोधनमा डा. छेत्रीले विश्वव्यापीकरणको वर्तमान सन्दर्भमा संस्कृतिहरू, पहिचानहरू तथा क्षेत्रीय कथानकहरू बुझ्न यात्रावृत्तान्त लेखनको महत्त्वमाथि प्रकाश पारे। दार्जीलिङ टु डिस्ट्यान्ट डेस्टिनेसन्स-ले स्थानीय पहिचान र विश्वव्यापी अनुभवबीचको सम्बन्धलाई प्रतिबिम्बित गर्दै पूर्वी हिमालय क्षेत्रबाट आएको समकालीन यात्रासाहित्यमा महत्वपूर्ण योगदान पुर्याएको छ।
स्यालमेण्डर इम्प्रिन्ट्सको शुभारम्भसहित सम्पन्न उक्त पुस्तक विमोचन कार्यक्रममा लेखक, सामाजिक अभियन्ता, अनुसन्धानकर्ता तथा विभिन्न क्षेत्रका विद्वानहरूको उल्लेखनीय उपस्थिति रहेको थियो। स्वागत मन्तव्यमा स्यालमेण्डर इम्प्रिन्ट्सका संस्थापक–निर्देशक राजा पुनियानीले इम्प्रिन्टको नाम पूर्वी हिमालय क्षेत्र, विशेषगरी दार्जीलिङमा पाइने ‘जीवित जीवाश्म’ मानिने स्यालमेण्डरको संरक्षण आवश्यकताबाट प्रेरित भएको बताए। उनले आगामी दिनमा स्यालमेण्डर इम्प्रिन्ट्सले गुणस्तरीय अनुसन्धानमूलक कृतिहरू तथा ऐतिहासिक उपन्यास प्रकाशनमा विशेष ध्यान दिने घोषणा गरे। प्रकाशनाधीन कृतिहरूमा शारदा छेत्रीको अ लेगेसी अफ सरो : अ स्टोरी फ्रम दार्जीलिङ (अङ्ग्रेजी उपन्यास); कुमार प्रधानको द गोर्खा कङ्क्वेस्ट्स (अङ्ग्रेजी तथा नेपाली संस्करण); चर्चिल सुब्बाको हाम्रा लोकबाजा; सौमेन नागको कञ्चनजङ्गाय अशान्तिर आगुन; तथा बबिता मादेनको १९८६: वास हराएपछि-को अङ्ग्रेजी संस्करणलगायतका कृतिहरू रहेका छन्।
यस अवसरमा केक काट्ने कार्यक्रममार्फत् स्यालमेण्डर इम्प्रिन्ट्सको औपचारिक शुभारम्भ पनि गरियो। बुक-आण्ट तथा स्यालमेण्डर इम्प्रिन्ट्सका लोगो डिजाइनर तथा द कर्ड भारतका सीईओ राहुल सम्भवी सिन्हालाई उनको सिर्जनात्मक योगदानका लागि सम्मानित गरियो। लेखकको औपचारिक परिचय गोथल्स स्कूलका शिक्षक दीप छेत्रीले गराएका थिए। कार्यक्रमको सञ्चालन श्रद्धा शर्माले गरेकी थिइन्।
