खरसाङ, (निसं)ः खरसाङमा फोहोर-मैला प्रबन्धनको निम्ति ठोस र उपयुक्त कदम उठाउन पर्ने आवश्यकता देखिएको छ। फोहोर-मैलाको उचित प्रबन्धनको अभावमा जनसाधरणले समस्याको सामना गरिरहेका छन्। राज्य शहरी विकास प्राधिकरणको योजना अन्तर्गत खरसाङ नगरपालिकाले केही वर्ष तया नगरवासीको घर-आँगनबाट फोहोर-मैला सङ्कलन गर्ने कार्य गरिरहेको छ। नगरवासीको घर-आँगनबाट फोहोर-मैला सङ्कलन गरिने गरिएको भए तापनि यो कार्य प्रभावकारी बन्न नसकेको पाइएको छ। खरसाङ शहरको विभिन्न स्थानमा फोहोर-मैला थुप्रिने क्रम वर्तमानसम्म जारी छ। कुनै समय थुप्रिएको फोहोर-मैलाको थुप्रोले विभिन्न समस्याहरू सृजना गरेको पाइएको छ।
खरसाङको सुपर मार्केट नजिक अघि मैलादानी रहेको तर पछि घर-आँगनबाट फोहोर-मैला उठाउन आरम्भ गरिएको मैलादानी बन्द गरिएको स्थानमा फोहोर-मैला थुप्रिने क्रम धेरै अघिदेखि यथावत रहेको छ। यहाँ नियमित फोहोर-मैला थुप्रिने गरेको छ भने कुनै समय फोहोर-मैलाको थुप्रोले विकराल रुप लिएको पनि देखिन्छ। यहाँ थुप्रिएको फोहोर-मैलाको कारण यस स्थानमा रहेका विभिन्न गनतव्यतिर जाने सेण्डिकेटाका गाड़ी चालक, यात्री, पैदल हिँड़ने मानिस, नजिका दोकानेहरूले समस्याको सामना गर्न परिरहेको गुनासो छ। खरसाङ्को प्रधान प्रेट्रोल पम्पदेखि केही पर राष्ट्रि राजमार्गको किनारमा पनि फोहोर-मैला थुप्रिने क्रम बन्द भएको छैन। वर्तमानमा पनि यहाँ फोहोर-मैलाको डङ्गुर रहेको पाइएको छ। यहाँ थुप्रिएको फोहोर-मैलाको कारण बाटो हिँड़ने, स्थानीय मानिसहरू समस्यामा परेका छन् भने गाड़ी र रेल चढ़ेर खरसाङ अनि दार्जीलिङ आउने पर्यटकहरूमा यो फोहोर-मैलाको कारण नकारात्मक असर परेको पनि मानिसहरूको मत छ।
यसै गरी खरसाङ बजारको अन्य स्थानहरूमा पनि फोहोर-मैला थुप्रिएको पाइएको छ। शहरलाई सुन्दर, स्वच्छ अनि प्रदुषण रहित राख्नको निम्ति राज्य शहरी विकास प्रधिकरणको योजना अनुसार फोहोर-मैला प्रबन्धनको निम्ति कार्य भइरहेको छ। खरसाङ नगरपालिका क्षेत्रमा यो कार्य भइरहेको भए तापनि यसको प्रभावकारिता सन्तोषजनक पाइएको छैन। यस दिशामा खरसाङ नगरपालिका लगायत सम्बन्धित निकायहरूले ठोस अनि सक्रियता पूर्वक कार्य गर्न पर्ने आवश्यकता रहेको छ।
